لاہور(ویب ڈیسک) وزیر مملکت برائے ماحولیاتی تبدیلی زرتاج گل نے کہا ہے کہ پاکستان کی مٹی سونا اگلتی ہے اور قدرتی حسن سے مالامال ہے،ہم نے اس ملک کی قدر نہیں کی،ہماری زراعت کی پیداوار کی صلاحیت کم ہو گئی ہے،بلوچستان میں قحط سالی ہے اورپانی کی سطح مزید نیچے چلی گئی ہے،اقدامات نہ کئے تو اگلے پینتیس سال میں بہار اور خزاں کاموسم ختم ہو جائے گا۔ پلانٹ فار پاکستان ڈے کے موقع پر شجر کاری مہم کے سلسلہ میں منعقدہ تقریب سے خطاب کرتے ہوئے زرتاج گل نے کہا کہ سابق وزیر اعلی ٹوپی پہن کر سیلاب میں سیلفیاں بنواتے رہے لیکن اس سے تبدیلی نہیں آئی، پاکستان میں خطرہ ہے،چاروں موسم ختم ہو رہے ہیں، اقدامات نہ کئے تو اگلے پینتیس سال میں بہار اور خزاں کاموسم ختم ہو جائے گا۔ ہیٹ ویو سے کراچی میں تین ہزار لوگ ہلاک ہوئے کیونکہ اندھا دھند کالونیز بنائی گئیں، لوگ کراچی میں سیلاب اور بارش کے نذر ہو گئے لیکن بلاول بھٹو زرداری کہتے ہیں بارش آتا ہے تو پانی آتا ہے،زیادہ پانی آتا ہے تو زیادہ پانی آتا ہے۔ انہوں نے کہا کہ گند ہم پھینکیں تو ترکی کی کمپنی کیوں اٹھائے۔ انہوں نے کہا کہ سیلاب سے بچاؤ کے لئے 7.8ارب روپے کا بجٹ رکھا گیا ہے۔ انہوں نے کہا کہ چھانگا مانگا میں سرکاری زمین کو واگزار کروا کر ہریالی لگائی،پاکستان میں پرندے نایاب ہو چکے ہیں،نایاب پرندوں کے شکار پر پابندی پابندی لگائی جائے،وزیر اعلیٰ پنجاب وعدہ کریں کہ خیبر پختوانخواہ کی طرح پنجاب کو بھی پولی تھین بیگ فری بنائیں گے۔ دوسری جانب ایک خبر کے مطابق وفاقی دارالحکومت اسلام آباد کی طرح پنجاب حکومت نے بھی پنجاب میں پلاسٹک کے تھیلوں پر پابندی لگانے کا فیصلہ کرلیا ہے، وزیراعلی پنجاب سردار عثمان احمد خان بزدار نے پلاسٹک کے تھیلوں پرپابندی سے متعلق سمری منظور کرلی ہے۔ تفصیلات کے مطابق ’’ پلانٹ فار پاکستان مہم‘‘ کی تقریب سے خطاب کرتے ہوئے وزیراعلی پنجاب سردار عثمان بزدار نے کہا کہ آئندہ کابینہ کے اجلاس میں پلاسٹک کے تھیلوں پرپابندی کی منظوری لی جائے گی۔ انہوں نے کہا کہ پنجاب میں وسیع پیمانے پر پودے لگائے جائیں گے، پاکستان کی تاریخ میں ایسی شجرکاری کی مثال نہیں ملتی،حکومت پنجاب شجرکاری کیلئے سرگرم ہے،شجرکاری پروجیکٹ کے لئے خطیر رقم مختص کی گئی ہے،جنگلات میں اضافے کا ہدف پورا کریں گے، پاکستان کو سرسبز و شاداب بنائیں گے۔وزیراعلی پنجاب سردار عثمان احمد خان بزدار نے کہا کہ شجرکاری مہم پاکستان تحریک انصاف کی اولین ترجیح ہے، شجرکاری مہم ایک گیم چینجر ثابت ہو گی، شجرکاری مہم میں طلبا و دیگر شعبہ ہائے زندگی کے افراد کو شامل کیا جا رہا ہے۔ انہوں نے کہا کہ بلین ٹری سونامی کے تحت چھبیس ارب روپے مختص کئے گئے ہیں، اگلے چار سالوں میں بیالیس کروڑ پودے لگائے جائیں گے جو ریکارڈ ہوگا، گرین اور سر سبز پنجاب کے لئے ایسے تاریخی منصوبے کی مثال نہیں ملتی۔ عثمان بزدار نے کہا کہ پنجاب حکومت پہلی بار سرکاری زمینوں پر قبضے سے واگزار کروا رہی ہے، اس مہم سے ہزاروں ایکٹر واگزار کروا کر سرکاری اداروں کو واپس کیا جا رہ اہے جسے شجر کاری کے لئے مختص کر د یا گیا ہے۔ وزیر اعلی پنجاب سردار عثمان بزدار نے کہا کہ درخت ہمارے دوست ہیں جو ہمیشہ وفا کرتے ہیں ایسے دوستوں کو کبھی فراموش نہیں کرنا چاہئے۔ دوسری جانب ایک خبر کے مطابق وزیراعلی پنجاب سردار عثمان احمد خان بزدار نے پلاسٹک کے تھیلوں پرپابندی سے متعلق سمری منظور کرلی ہے۔
