لاہور;بحیرۂ عرب اورخلیج بنگال کی مون سون ہوائیں پاکستان میں داخل ہونا شروع ہوگئیں،محکمہ موسمیات کے مطابق مون سون ہواؤں میں جمعرات سے شدت آنے کا امکان ہے۔محکمہ موسمیات کا کہنا ہے کہ مغربی ہواؤں کا نیا سلسلہ بھی ملک کے بالائی علاقوں میں آج سے متوقع ہے، بارشوں کا آغاز کشمیرسے ہوا ہے،
یہ سلسلہ بالائی پنجاب اورخیبر پختونخوا تک جائے گا۔آزاد کشمیر میں مون سون کی بارشوں کا آغاز ہو گیا، آزاد کشمیر کےعلاقے نکیال میں وقفے وقفے سے گرج چمک کے ساتھ بارش جاری ہے،ملک کے دیگرحصوں میں موسم گرم اور خشک ہے۔محکمہ موسمیات نے پنجاب، گلگت بلتستان اور کشمیر کے کچھ مقامات پر گرج چمک کے ساتھ بارش کی پیش گوئی کی ہے۔گلگت بلتستان اور خیبرپختونخوا کے بالائی علاقوں میں کہیں موسم صاف اور کہیں ابرآلود ہے۔سندھ، پنجاب اور بلوچستا ن کے بیشتر شہروں میں موسم گرم اور خشک ہے جبکہ کئی شہروں میں حبس اور لو نے شہریوں کا براحال کر رکھا ہے۔بلوچستان کے کئی علاقوں میں موسم شدید گرم ہے، میدانی علاقوں سبی، بولان، چاغی، دالبندین اور ماشکیل میں لو چل رہی ہے۔محکمہ موسمیات کے مطابق آئندہ24گھنٹوں کے دوران ملک کے بیشتر علاقوں میں موسم شدید گرم اور مرطوب رہے گا۔مالاکنڈ، ہزارہ، راولپنڈی، گوجرانوالہ، لاہور ڈویژن، اسلام آباد، گلگت بلتستان اور کشمیر میں چند مقامات پر تیز ہواؤں اور گرج چمک کے ساتھ بارش کا امکان ہے۔محکمہ موسمیات کی جانب سے جمعرات سے اتوار تک لاہور، اسلام آباد، راولپنڈی، گوجرانوالہ، ساہیوال، ملتان ڈویژن، مالا کنڈ، ہزارہ، پشاور، مردان، کوہاٹ ڈویژن، فاٹا، کشمیر، بنوں، ڈی آئی خان میں بارش کی پیشگوئی کی گئی ہے۔
ہفتے سے اتوار تک سندھ اور شمالی بلوچستان میں چند مقامات پر بارش متوقع ہے جبکہ بارش کے ساتھ گرج چمک ہونے اور تیز ہوائیں چلنے کا بھی امکان ہے۔دوسری جانب ایک خبر کے مطابق ہفتے سے اتوار کے دوران سندھ ، شمالی بلوچستان میں چند مقامات پر تیزہواؤں اور گرج چمک کیساتھ بارش کی پیشگوئی کی ہے۔ جمعے سے اتوار کے دوران کشمیر ، گوجرانوالہ ، لاہور، راولپنڈی، ہزارہ اور مالاکنڈ ڈویژن میں چند مقامات پر موسلادھار بارش کی پیشگوئی کی ہے۔منگل کے روز ملک کے بیشتر علاقوں میں موسم شدید گرم اورمرطوب رہے گا تاہم مالاکنڈ، ہزارہ، راولپنڈی، گوجرانوالہ، لاہور ڈویژن، اسلام آباد، گلگت بلتستان اور کشمیر میں چند مقامات پرتیزہواوں اور گرج چمک بارش کا امکان ہے۔محکمہ موسمیات کے مطابق گزشتہ 24 گھنٹوں کے دوران ملک کے بیشتر علاقوں میں موسم شدید گرم اور مرطوب رہا تاہم کوٹلی میں 16ملی میٹر بارش ریکارڈ کی گئی۔ پیر کو ریکارڈ کیے گئے گرم ترین مقامات کے درجہ حرارت کے مطابق سبی48، ڈی آئی خان، بھکر، دالبندین میں 46 ڈگری سینٹی گریڈ ریکارڈکیاگیا۔
