اسلام آباد: پاکستان تحریک انصاف کے امیدواراسد عمر کی کارنرمیٹنگ میں ہوائی فائرنگ کا مقدمہ تھانہ رمنا میں پولیس کی مدعیت میں درج کر لیا گیا۔
پی ٹی آئی امیدواراسد عمر کی کارنر میٹنگ میں ہوائی فائرنگ کے مقدمے کے متن کے مطابق پی ٹی آئی کی ریلی کے دوران مسلم لیگ ن کی چند گاڑیاں ریلی کے پاس سے گزریں اورپولیس نے گاڑیاں کوممکنہ ہنگامی صورتحال کے پیش نظرروک دیا تھا لیکن گاڑیوں کو روکنے کے دوران نامعلوم جانب سے ایک فائر ہوااور تھوڑی دیر بعد دوسری طرف سے چار فائر ہوئے تھے۔اس موقع پر پولیس کا کہنا تھا کہ ابھی تک مقدمے میں نہ کسی کو نامزد کیا گیا اور نہ کوئی گرفتاری ہوئی ہے ۔واضح رہے کہ گزشتہ شب جی ٹین میں پی ٹی آئی امیدوار اسد عمرکی کارنرمیٹنگ کے دوران ہوائی فائرنگ کی گئی تھی تاہم تحریک انصاف کے کارکن اور اسد عمر محفوظ رہے تھے۔ پاکستان تحریک انصاف (پی ٹی آئی) کے رہنما اسد عمر کی کارنر میٹنگ کے دوران فائرنگ کردی گئی۔پولیس کے مطابق فائرنگ کا واقعہ اس وقت پیش آیا جب این اے 54 سے پی ٹی آئی کے امیدوار اسد عمر عدنان مارکیٹ میں کارنر میٹنگ سے خطاب کر رہے تھے تاہم واقعے میں پی ٹی آئی امیدوار محفوظ رہے۔پی ٹی آئی کے نائب صدر نے واقعے کے بعد بتایا کہ اسد عمر سمیت پی ٹی آئی کے کارکنان محفوظ ہیں اور واقعے میں کوئی زخمی نہیں ہوا جب کہ پی ٹی آئی کے کارکنان واقعے کا مقدمہ تھانہ رمنا میں درج کرادیا۔ایس پی صدر زون ذیشان حیدر کا کہنا تھاکہ واقعے کے بعد ملزمان کی گرفتاری کے لیے ناکہ بندی کردی ہے۔ایس پی نےکہا کہ الیکشن کے موقع پرشر پسند عناصر سے سختی سے نمٹا جائے گا، فائرنگ کا مقصد خوف ہراس پھیلانا تھا۔
