لاہور(ویب ڈیسک) پاکستان شوبز انڈسٹری کی معروف جوڑی اقرا عزیز اور یاسر حسین کے شادی کے بندھن میں بندھنے کے دن قریب ہیں، ایسے میں سوشل میڈیا صارفین پر اس خوبصورت جوڑے کی شادی کی تقریبات کی تعداد جاننے کے لئے بے تاب ہیں۔ گزشتہ روز اقرا اور یاسر کا ویڈنگ کارڈ سوشل میڈیا
پر منظر عام پر آنے کے بعد عباس محمد نامی صارف نے سوال کر ہی ڈالا کہ اس سال کی سب سے ’اوور ریٹڈ‘ یعنی سب سے مقبول جوڑی کی شادی کتنی طویل ہوگی؟ کیا دو ماہ؟ صارف کے سوال کا جواب دینے اقرا عزیز کی بڑی بہن سدرہ عزیز میدان میں آگئیں اور کہا کہ ’سر! یہ ایک نجی تقریب ہے، صرف مہندی اور نکاح، مجھے اس سے زیادہ وضاحت دینے کی ضرورت نہیں ہے اور اس شادی کی تقریبات کوئی دو ماہ نہیں چلیں گی، ہم میں سے کوئی نمود و نمائش کی خواہش نہیں رکھتا۔‘ یہ بحث یہاں ختم نہیں ہوئی، سدرہ عزیز کی حمایت میں ایک خاتون صارف آگے آئیں اور کہا کہ ’آپ ایسے جل کر بول رہے ہیں جیسے آپ کی بہن کی شادی ہونی تھی یاسر سے جو نہیں ہوئی۔ عباس محمد نے جوابی ٹوئٹ میں لکھا کہ ’الحمد اللّہ میری دو بہنیں شادی شدہ ہیں اور اچھی جگہ پر ہیں، اگر میری بہن کی شادی یاسر جیسے شخص سے ہو رہی ہوتی تو میں اُس کی شادی روک دیتا۔‘ اقرا عزیز اور یاسر کی شادی کےحوالے سے سوشل میڈیا پر اٹھنے والی آگ کو ٹھنڈا کرنے کے لئے سدرہ عزیز کو ہی بیچ بچاؤ کرانا پڑا۔انہوں نے اس لڑائی کا اختتام یہ کہہ کر کر دیا کہ ’اللّہ آپ کی دونوں بہنوں کو خوش رکھے آمین۔‘سدرہ عزیز نے اپنے ایک اور ٹوئٹ میں لکھا کہ ’لوگوں کی خوشیوں میں خوش ہونا سیکھیں، اِس سے زندگی بہت ہی پُر مسرت گُزرتی ہے۔‘واضح رہے کہ اقرا عزیز اور یاسر حسین کی شادی رواں ماہ 28 دسمبر کو ہوگی، شادی کے کارڈ کی تصویر گزشتہ روز یاسر حسین اور اقرا عزیز نے اپنے اپنے انسٹاگرام اکاؤنٹ پر شیئر کی تھی۔
