یمن میں جاری حالیہ جنگ سے بہت دور اپنی نوعیت کے نادر مظہر میں الخزنہ گاؤں کے لوگ دن میں نابینا ہو جاتے ہیں.
صنعا: یمن میں جاری حالیہ جنگ سے بہت دور اپنی نوعیت کے نادر مظہر میں الخزنہ گاؤں کے لوگ دن میں نابینا ہو جاتے ہیں جبکہ رات کے وقت اور مکمل تاریکی میں انہیں نظر آنے لگتا ہے۔ یہ گاؤں یمن کے صوبے حجہ کے ضلع عبس کے علاقے “بنو الحسن” میں واقع ہے۔ دارالحکومت صنعا کے جنوب مغرب میں واقع اس گاؤں کے باسی انتہائی غربت، بجلی اور پانی کی شدید قلت میں زندگی گزار رہے ہیں۔ اس کے علاوہ یہاں کے لوگ دن میں سورج چڑھنے کے ساتھ ہی اندھے پن کا شکار ہو جاتے ہیں اور غروب آفتاب کے ساتھ ان کی بینائی بہتر ہو جاتی ہے۔ اگرچہ یمن میں اس سے ملتی جلتی صورتحال کی کوئی رپورٹ نہیں ہے تاہم ڈاکٹروں نے باور کرایا ہے کہ اس حالت کا سبب موروثیت ہے۔ ماہر امراض چشم ڈاکٹر حسین النفیلی نے بتایا کہ یہ آبادی ایک ایسے مرض میں مبتلا ہے جس میں آنکھ کی شبیہہ میں موجود حاصلاتِ نور شدید متاثر ہوتے ہیں۔ ڈاکٹر النفیلی نے بتایا کہ مختلف عمروں کے افراد کو درپیش اس مرض کا کوئی علاج نہیں ہے تاہم خاص قسم کے دھوپ کے چشموں کی مدد سے دن کے وقت آنکھوں کو پہنچنے والی روشنی کی حدت کم کی جا سکتی ہے۔ اس طرح یہ لوگ دن کے وقت بھی معمول کی زندگی سے لطف اندوز ہو سکتے ہیں۔
