کراچی; سندھ کے تعلیمی اداروں کے لیے گرمیوں کی چھٹیاں بڑھا دی گئیں۔ موسم گرما کی تعطیلات 16جولائی کی بجائے31 جولائی تک ہوں گی، محکمہ تعلیم سندھ نے چھٹیوں میں اضافے کا نوٹیفیکیشن جاری کردیا ہے ۔تفصیلات کے مطابق الیکشن کا وقت قریب سے قریب تر ہوتا جارہا ہے ،جس کے بعد
الیکشن کی گہما گہمی بڑھتی جارہی ہے۔ایسے حالات میں سیاسی جماعتوں کی جانب سے اس تاریخی انتخابی معرکے کو لڑنے کے لیے بھرپور انداز میں تیاریاں شروع کر دی گئی ہیں۔ایسے میں سیاسی جماعتوں نے مخالفین کو سیاسی میدان میں دھول چٹانے کی تیاریاں عروج پر پہنچ چکی ہیں۔بڑے بڑے سیاسی رہنما اپنے مخالفین کی ساکھ خراب کرنے کے لیے ایک دوسرے پر الزامات کی بوچھاڑ کر رہے ہیں اور ایک دوسرے کو برا بھلا کہہ رہے ہیں۔الیکشن کی اس گہما گہمی میں سرکاری اداروں نے بھی الیکشن کے انعقاد کی بھرپور تیاریاں کر لی ہیں ۔اس حوالے سے سندھ کے طلبا و طالبات کے لیے بڑی خوشخبری یہ ہے کہ سندھ حکومت نے گرمیوں کی تعطیلات میں اضافہ کردیا ہے۔عام انتخابات کی وجہ سے تعطیلات میں 31جولائی تک توسیع کی گئی ہے۔محکمہ تعلیم سندھ کا مؤقف ہے کہ اساتذہ الیکشن میں پولنگ اسٹیشنز میں فرائض میں مصروف ہوں گے اور مختلف تعلیمی اداروں میں پولنگ اسٹیشن بھی قائم ہوں گے۔اس موقع پر محکمہ تعلیم سندھ نے چھٹیوں میں اضافے کا نوٹیفیکیشن بھی جاری کردیا ہے،جس کے مطابق تعلیمی ادارے اب 31جولائی تک بند رہیں گے۔
یاد رہے کہ اس بار گرمیوں کے باعث سندھ بھر میں گرمیوں کی تعطیلات قبل ازوقت شروع کر دی گئی ہیں۔ واضح رہے کہ مئی میں ہونے والی شدید گرمی اور رمضان المبارک کے باعث موسم گرما کی تعطیلات کا شیڈول تبدیل کردیا گیا تھا اور اسکول یکم جون سے بند ہونے کے بجائے 15 مئی کو بند کرکے 15 جولائی سے کھولنے کی منظوری دی گئی تھی جبکہ اساتذہ کی الیکشن میں ڈیوٹیز دینے کی وجہ سے ایک ہفتہ قبل سیکریٹری اسکول ایجوکیشن کی جانب سے اسکول یکم اگست سے کھولنے کی تجویز دی گئی تھی۔ واضح رہے کہ 25جولائی سے عام انتخابات ہونے جارہے ہیں۔
