حکومت پنجاب کا ایک ہزار کروڑ روپے مالیت سے زیادہ کا خصوصی پرتعیش طیارہ ، پرواز کا خرچہ 28 لاکھ روپے فی گھنٹہ ہوگا
طیارہ کئی ہفتے قبل پاکستان پہنچ گیا تھا چھ فروری سے پروازوں کا سلسلہ جاری ہے اس دوران طیارے نے لاہور سے بلوچستان اور میانوالی کے درمیان پروازیں بھی کیں
کیا طیارے کے بارے میں’’ چرچا کا وقت‘‘ طے شدہ حکمت عملی کے تحت ’’ واشنگٹن میں غزہ بورڈ آف پیس ‘‘کے اجلاس کی خبروں سے توجہ ہٹانے اور منقسم کرنے کے لیے متعین کیا گیا تھا ؟؟؟؟؟
طیارے کے بارے میں چشم کشا انکشافات اور عظمی بخاری کی مضحکہ خیز وضاحتیں
پاکستان میں بنگلہ دیش ہائی کمیشن کے پریس کونسلر کی افطار ڈنر میں، روف کلاسرا سے’’ بصری شناسائی ‘‘خصوصی شرکت دونوں ملکوں کے درمیان وی لاگرز کا تبادلہ ہوگا ہمدم دیرینہ اور تین دھائیوں کی سیاسی اور صحافتی تاریخ اور واقعات کے’’ قصہ گوعامر متین ‘‘کی یاداشتیں
چارسابق وزرائے اطلاعات چھ پرنسپل انفارمیشن آفیسر سمیت سرکاری ریڈیو اور ٹی وی کے ریٹائرڈ سربراہان اورافسران کی شرکت
“”فاروق اقدس “”
سابق سیکرٹری اطلاعات و نشریات سید انور محمود نے میڈیا کی ریٹائرڈ شخصیات کی “ری یونین” کے لیے افطار ڈنر کا سلسلہ کم و بیش دو دہائی قبل شروع کیا تھا جس میں وزارت اطلاعات کے مختلف شعبوں کے ریٹائرڈ اور حاضر سروس سربراہان اور افسران کو مدعو کیا جاتا تھا پھر بتدریج اس ’’سالانہ اجتماع‘‘ میں پرنٹ اور بعد میں الیکٹرانک میڈیا کے ساتھ ساتھ بعض سیاسی شخصیات کی شرکت بھی شروع ہو گئی …اس افطار ڈنر کی ایک انفرادیت یہ بھی رہی ہے کہ اس کا اہتمام پہلے یا دوسرے روزے کے موقع پر ہی کیا جاتا ہے اور تمام شرکا حالات حاضرہ پر آزادانہ تبادلہ خیال کرتے ہیں …20 فروری کو ہونے والے افطار ڈنر میں ’’ہاٹ ایشو موضوع کی شکل میں‘‘پنجاب حکومت کی جانب سے اسرائیلی /امریکی ساخت کا جدید پرتعیش اور خصوصی طیارے کی خریداری کے حوالے سے تھا جس کی مالیت پاکستانی کرنسی میں لگ بھگ 11 ارب روپے بنتی ہے پی ٹی وی کے مقبول اینکر عبدالمالک جن کا شمار بے دھڑک گفتگو کرنے والے اینکرز میں ہوتا ہے وہ اپنے دیگر ساتھیوں کی طرح پرنٹ میڈیا کو مکمل طور پر خیرباد کہہ کر اس حد تک الیکٹرانک میڈیا کے ہو چکے ہیں کہ اب سگریٹ بھی الیکٹرانک /الیکٹرک پیتے ہیں اس طیارے کے بارے میں ان کی معلومات وسیع اور پر جوش ہیں ان کا کہنا تھا کہ طیارے کی ایک گھنٹے اڑان کا خرچہ 28 لاکھ روپے کے لگ بھگ ہے جبکہ اس میں 19 افراد کے بیٹھنے کی گنجائش ہے اور’’ باوقت ضرورت ‘‘ان نشستوں میں زیادہ آرام اور طویل سفر کے دوران کسی مداخلت کے بغیر مسافروں کے ’’دراز‘‘ ہونے کابھی اہتمام اورگنجائش ہوتی ہے یہ انکشاف بھی ہوا کہ وزیر اعلی پنجاب مریم نواز نے طیارےکی خریداری اور متعلقہ بھاری اور اضافی اخراجات کی منظوری بھی کابینہ سے باضابطہ طور پر لی تھی اور دستاویز کے مطابق طیارے میں وزیراعلی پنجاب گورنر پنجاب اور دیگر اہم شخصیات جن میں غیر ملکی مہمان بھی شامل ہیں اس طیارے میں سفر کر سکیں گے جبکہ طیارے کے بارے میں حکومت پنجاب کی وزیر اطلاعات سے باضابطہ تفصیلات حاصل کرنے کے لیے ان سے مختلف صحافتی اداروں اور اینکرز نے رابطہ کیا لیکن ابتدائی طور پر انہوں نے اس حوالے سے مکمل خاموشی اختیار کی بعد میں انہوں نے جو وضاحت پیش کی ان پر خاصہ ٹھٹھہ لگا۔۔۔ اس موقع پر ایک تجزیہ نگار کا یہ بھی خیال تھا کہ طیارے کی پروازوں کا آغاز 8؍ فروری سے ہو گیا تھا اس دوران لاہور سے کوئٹہ اور میانوالی پروازوں کا ریکارڈ بھی موجود ہے لیکن عین اس موقع پر اس خبر کا چرچہ ہونا درحقیقت واشنگٹن میں’’ غزہ بورڈ آف پیس‘‘ کے اجلاس کی خبروں سے توجہ منتشر کرنا مقصود تھا (اگر اس بات میں صداقت ہے تو پھر یہ حکمت عملی وضع کرنے والے اپنے مقصد میں کافی حد تک کامیاب رہے ہیں کیونکہ سرکاری اور نجی میڈیا پر اس حوالے سے گفتگو کرنے کی مکمل آزادی تھی۔ اور واشنگٹن سے غزہ بورڈ آف پیس کے اجلاس کی صرف مقصود،محدود اور حکومت کی مطلوبہ خبریں ہی منظر پر آ سکیںجبکہ جہازکا موضوع چھایا رہا) افطار ڈنرمیں پاکستان میں بنگلہ دیش کے ہائی کمیشن کے پریس کونسلر طیب علی کی شرکت کو اسلام آباد اور ڈھاکہ کے درمیان پرجوش تعلقات اور نئی حکومت کی قیام کے تناظر میں دیکھا گیا افطار ڈنر کے شرکاء نے فردا ً فردا ً ملاقات میں طیب علی کو بنگلہ دیش میں نئی حکومت کے قیام پر مبارکباد دی اور بالخصوص دونوں طرف سے ابلاغ کے شعبوں میں قریبی رابطوں کی ضرورت پر بھی زور دیا بنگلہ دیش کے پریس کونسلر طیب علی نے اس موقع پر موجود الیکٹرانک میڈیا کے مقبول اور مانوس چہرے روف کلاسرا سے بھی’’ بصری شناسائی‘‘ کا اظہار کیا ذرائع کے مطابق آنے والے دنوں میں دونوں ملکوں کے وی لاگرز بھی اسلام اباد اور ڈھاکہ کے دورے پر جائیں گے۔
