مظفر گڑھ (ویب ڈیسک) بھارتی فلم سٹار سلمان خان اور پاکستان کے وزیر ریلوے شیخ رشید ایک ہی کیٹیگری کے ہیں اور دونوں ہی سے ایک سوال بارہا پوچھا جاتا ہے کہ شادی کب کر رہے ہیں۔ تاہم سلمان خان کے ماڈل پر پاکستان میں ایک اور سیاستدان بھی ہیں جو اپنی ہڑبونگ مزاجی اوردستی انداز کی وجہ سے کافی معروف رہتے ہیں۔ان کا نام جمشید دستی ہے انہوں نے بھی ابھی تک شادی نہیں کی مگر ان سے اس قدر شادی کے متعلق سوال نہیں کیا جاتا جتنا کہ شیخ رشید سے کیا جاتا ہے۔ جمشید دستی کا اسٹائل ہمیشہ عوام میں مقبول رہا ہے کبھی گدھا گاڑی پر الیکشن کمپین، کبھی سرمنڈوا کر احتجاج اور کبھی جعلی ڈگری کیس میں جیل کے چکر لگنے پر روتے ہوئے سیاست سے توبہ کرنا،ہر حوالے سے دستی ایک نیا اسٹائل لے کر میڈیا کی زینت بنتے آ رہے ہیں ۔ تاہم اب جمشید دستی نے عمران خان کی پیروی کرتے ہوئے دھرنے کے دوران شادی کرنے کا اعلان کردیا ہے۔انہوں نے مولانا کے مارچ میں شمولیت کا اعلان کرتے ہوئے شادی کا اعلان بھی کر دیا ہے۔
جہاں ن لیگ اور پیپلز پارٹی مولانا کے آزادی مارچ کا حصہ بننے کے لیے گومگو کی صورت حال کا شکار ہیں وہاں عوامی راج پارٹی کے سربراہ جمشید دستی نے مولانا فضل الرحمان کے آزادی مارچ میں شادی کرنے کا عندیہ دے دیا۔ جمعیت علماءاسلام (ف) کے سربراہ مولانا فضل الرحمان نے 27 اکتوبر کو حکومت مخالف “آزادی” مارچ کا اعلان کر رکھا ہے۔ نجی نیوز چینل سے گفتگو کرتے ہوئے جمشید دستی نے کہا کہ جب بھی خوشی کی تیاری کرتا ہوں،کوئی مسئلہ کھڑا ہوجاتا ہے، اب تو لوگ کہتے ہیں کہ آپ بھی شیخ رشید بنتے جا رہے ہیں۔ جمشید دستی کا مزید کہنا تھا کہ 2019 میں شادی کا ارادہ تھا لیکن اس سال تو شادی ہوتی نظر نہیں آ رہی۔ مولانا فضل الرحمان کے آزادی مارچ کے دوران شادی کا اعلان کروں گا اور 2020 میں سادگی سے شادی کر لوں گا۔ پاکستان تحریک انصاف کے سابق اتحادی نے حکومت کو تنقید کا نشانہ بناتے ہوئے کہا کہ اللہ حکمرانوں کو بھی وعدے بنھانے کی توفیق عطا کرے۔
