اسلام آباد (ویب ڈیسک) تمام شکایتیں نظر انداز، وزیر اعظم عمران خان نے وزیراعلیٰ پنجاب سردار عثمان بزدار کی تبدیلی کے حوالے سے حتمی فیصلہ کرلیا۔ وزیراعظم عمران خان نے دو ٹوک مؤقف اختیار کرتے ہوئے کہا ہے کہ وزیراعلیٰ پنجاب عثمان بزدار کو تبدیل نہیں کیا جائے گا، (ق) لیگ سمیت ارکان اسمبلی
کی شکایات کو نظر انداز کر دیا۔ ذرائع کے مطابق وزیر اعظم نے وزیر اعلیٰ پنجاب عثمان بزدار کے خلاف (ق) لیگ سمیت کئی وفاقی وزرا اور ارکان اسمبلی کی شکایات کو نظر انداز کر دیا اور اتحادیوں کو واضح جواب دیا کہ عثمان بزدار تبدیل نہیں ہوں گے۔ ذرائع نے بتایا کہ وزیر اعلیٰ پنجاب عثمان بزدار کے حوالے سے شکایات کے معاملے پر وزیراعظم نے فیصلہ اپنے قریبی ساتھیوں سے مشاورت کے بعد کیا۔ ذرائع کے مطابق وفاقی وزراء نے پنجاب میں گورننس، ترقیاتی اسکیموں اور اختیارات کے حوالے سے شکایات کی تھیں اور جن لوگوں نے وزیراعظم سے شکایت کی ان میں فواد چوہدری، طارق بشیر چیمہ، شفقت محمود اور دیگر شامل ہیں۔
ذرائع نے مزید بتایا کہ وزیر اعظم کو قریبی ساتھیوں نے مشورہ دیا کہ عثمان بزدار اچھا کام کر رہے ہیں اس لیے ان کی حوصلہ افزائی کرنی چاہیے۔ واضح ہے کہ وزیراعلیٰ پنجاب عثمان بزدار کی بطور وزیراعلیٰ کارکردگی پر جہاں اپوزیشن جماعتیں تنقید کررہی ہیں وہیں وفاقی وزیر فواد چوہدری نے بھی ان کی کارکردگی پر سوالات اٹھائے ہیں جب کہ وفاقی وزیر نے وزیراعظم عمران خان کو ایک خط بھی لکھا۔
واضح رہے کہ گزشتہ کچھ روز سے تحریک انصاف کی اتحادی جماعتیں وزیراعلی پنجاب عثمان بزدار کے حوالے سے کھل کر اپنے تحفظات کا اظہار کر رہی ہیں۔ اتحادی جماعتوں کا موقف ہے کہ پنجاب میں گورننس کی صورتحال بہت خراب ہے۔ وزیر اعظم نے اپنے وسیم اکرم پلس کو تبدیل نہ کرنے کا فیصلہ کیا ہے۔
