سلامتی کونسل کے صدر کو وزیرخارجہ شاہ محمود قریشی کا خط، پاکستان اوربھارت میں اقوام متحدہ کے فوجی مبصری کو متحرک کرنے پر زور

اسلام آباد(خصوصی رپورٹ اصغر علی مبارک) مقبوضہ جموں وکشمیر (آئی او او جے کے) میں 5 اگست 2019 کے ہندوستان کے غیر قانونی اور یکطرفہ اقدامات کے ایک سال کے بعدوزیر خارجہ شاہ محمود قریشی نے ایک بار پھر اقوام متحدہ کی سلامتی کونسل کے صدر کو مقبوضہ جموں وکشمیر میں انسانی حقوق کی بڑے پیمانے پر خلاف ورزیوں سے آگاہ کرنے کیلئے خط لکھ دیا ہے۔وزیرخارجہ نے خط میں کہا ہے کہ مقبوضہ جموں کشمیر کی آبادکاری کو تبدیل کرنے کی کوشش اور لائن آف کنٹرول پر جنگ بندی کی خلاف ورزیوں اور پاکستان کے خلاف بیان بازی سے علاقائی اور بین الاقوامی امن و سلامتی کو خطرہ لاحق ہے۔ وزیر خارجہ نے اپنے خط میں یہ روشنی ڈالی ہے کہ کس طرح کشمیر میں فوجی محاصرے ، انٹرنیٹ اور مواصلات کے خاتمے ، کشمیری سیاسی رہنماؤں کو نظربند کرنے اور کشمیری نوجوانوں کو اغوا کرنے ، تشدد اور ماورائے عدالت قتل وغارت گری کو چھپانے کی منظم کوشش کر رہا ہے اور کشمیریوں پر اجتماعی سزا کا نفاذ کردیا گیا ہے۔انہوں نے کہا ہے کہ یہ مظالم سات دہائیوں سے زیادہ عرصہ سے ہندوستانی قبضے کے خلاف کشمیریوں کی مزاحمت کو دبانے میں ہندوستان کی بربریت کی علامت ہیں۔ پاکستان نے سلامتی کونسل کی سرکاری دستاویزات کے طور پر بھی دو کاغذات بھیجے ہیں ایک ، جموں و کشمیر تنازعہ کے قانونی پہلوؤں پر ، اور دوسرا مقبوضہ جموں وکشمیر میں بھارت کی انسانی حقوق کی خلاف ورزیوں پر۔ قانونی دستاویز میں کونسل کے ممبروں اور عالمی برادری کو کشمیریوں کے حق خود ارادیت کے مطالبےکی قانونی حیثیت سے آگاہ کیا گیا ہے۔ اسی طرح ہندوستان کی انسانی حقوق کی پامالیوں سے متعلق دستاویز کشمیری عوام کے خلاف ظلم اور سنگین جرائم کے ہندوستان کے طویل ریکارڈ کی مستقل گواہ ہے۔ وزیر خارجہ نے اس بات پر زور دیا ہے کہ بھارت کی جانب سے ایل او سی کے ساتھ سیز فائر کی شدید خلاف ورزیوں اور سخت جنگ ، امن و سلامتی کے لئے خطرہ ہے۔ وزیر خارجہ نے کونسل پر زور دیا ہے کہ وہ بھارت اور پاکستان میں اقوام متحدہ کے فوجی مبصرین گروپ (یو این ایم اوجی آئی پی) کو مضبوط بنائے تاکہ وہ مقبوضہ جموں و کشمیر میں سلامتی کے ماحول کی حساسیت کے بارے میں مکمل اور درست طور پر رپورٹ کرنے کے قابل بنائے۔ سلامتی کونسل کو بین الاقوامی امن و سلامتی کی بحالی کے لئے اپنی بنیادی ذمہ داری کی یاد دلاتے ہوئے وزیر خارجہ نے کونسل سے مطالبہ کیا ہے کہ وہ مقبوضہ جموں و کشمیر میں ہندوستان کے فوجی محاصرے کے نتائج اور ہندوستانی جارحانہ انداز کو پیدا ہونے والے سنگین خطرہ پر غور کرنے اور جنوبی ایشیاء میں امن و سلامتی کے لئے اجلاس طلب کرے۔ ۔