گلوکارہ میلنڈا کرکٹن مغربی سیکریمینٹو کی رہائشی ہیں اور ان کے گھر کی مالیت پاکستانی 50 لاکھ روپے کے برابر تھی
کیلیفورنیا : امریکہ میں راتوں رات ایک خاتون کا گھر چوری ہوگیا جس کی مالیت پاکستانی 50 لاکھ روپے تھی ۔ کیلیفورنیا کی رہائشی خاتون میلنڈا کرکٹن ایک گلوکارہ ہیں اور ان کا گھر مغربی سیکریمینٹو میں ہے ۔ اس گھر کی چوڑائی 8 فٹ اور لمبائی 33 فٹ ہے اور اب تک وہ اس پر 50 ہزار ڈالر خرچ کرچکی ہیں ۔ موسیقارہ اور گلوکارہ میلنڈا بے گھر افراد کی خدمت بھی کرتی ہیں اور غالباً یہ مکان اسی لیے تعمیر کیا جارہا تھا ۔ پولیس حکام کے مطابق یہ ایک انوکھا کیس ہے جس میں مکان ہی چوری ہوگیا ہے جسے 2 سال سے بنایا جارہا تھا ۔ چوروں نے اس کا لاک توڑا اور زنجیر بھی اتاری اور گھر کو غالباً کسی گاڑی کے ساتھ باندھ کر لے گئے تھے جسے اس سال تک مکمل ہونا تھا ۔ خاتون کے مطابق وہ مکان کے قرض اور اخراجات سے بچنا چاہتی تھیں اور اسی لیے موبائل مکان بنارہی تھیں وہ اسے کسی مناسب جگہ رکھنے کی راہ دیکھ رہی تھیں ۔ مکان غائب ہوتے ہی میلنڈا نے بہت سے لوگوں سے رابطہ کیا جن میں ایسے مکان کو ایک جگہ سے دوسری جگہ پہنچانے والی کمپنیاں بھی شامل ہیں لیکن انہیں اپنے گھر کا سراغ کہیں سے نہ ملا ۔
