کوئٹہ: مکران ڈویژن کے ضلع پنجگور میں دہشت گردوں کے حملے میں فرنٹیئر کور کے 4 اہلکار شہید ہو گئے۔
سرکاری ذرائع نے بتایا کہ صوبہ بلوچستان میں پنجگور کے پہاڑی علاقے میں واقع 2 چوکیوں پر شفٹ کی تبدیلی کے دوران نامعلوم مسلح افراد نے ایف سی اہلکاروں پر فائرنگ کردی۔ایف سی بلوچستان کے ترجمان خان واسع نے واقعے کی تصدیق کرتے ہوئے بتایا کہ 4 اہلکاروں کو متعدد گولیاں لگیں اور وہ موقع پر ہی دم توڑ گئے۔ذرائع نے بتایا کہ مسلح افراد ایف سی اہلکاروں کے ہتھیار بھی اپنے ہمراہ لے گئے۔واقعے کی اطلاع ملتے ہی سیکیورٹی فورسز کے اہلکار فوری طور پر جائے وقوع پر پہنچے اور شہدا کے جسد خاکی کو ہسپتال منتقل کر کے حملہ آوروں کی گرفتاری کے لیے آپریشن شروع کیا۔
شہید اہلکاروں کی شناخت لانس نائیک عبدالرحمٰن، سپاہی نصیب اللہ، سپاہی نعمان اور حق نواز کے نام سے ہوئی ہے۔ابھی تک کسی بھی گروپ نے حملے کی ذمے داری قبول نہیں کی۔یہ بلوچستان میں پیرا ملٹری فورسز پر 24 گھنٹے میں دوسرا حملہ ہوا تھا، جہاں اس سے قبل لورالائی میں حملے کے نتیجے میں 2 اہلکاروں نے جام شہادت نوش کیا تھا۔وزیر اعلیٰ بلوچستان جام کمال خان آلیانی نے حملے کی مذمت کرتے ہوئے ایف سی اہلکاروں کی شہادت پر افسوس کا اظہار کیا۔انہوں نے حملے کو بلوچستان میں امن اور ترقی کے خلاف سازش قرار دیا اور کہا کہ ایف سی اور سیکیورٹی فورسز نے صوبے میں امن کے قیام کے لیے عظیم قربانیاں دی ہیں۔وزیر اعلیٰ بلوچستان نے مزید کہا کہ حملے میں ملوث ملزمان کو جلد انصاف کے کٹہرے میں لایا جائے گا اور حکومت دہشت گردی کے خلاف جنگ جاری رکھے گی۔واضح رہے کہ اس سے پہلے صوبہ بلوچستان کے ضلع تربت دہشت گردوں نے باردوی سرنگ سے سیکیورٹی فورسز کی گاڑی کو نشانہ بنایا جس کے نتیجے میں 6 سیکیورٹی اہلکار شہید ہوگئے
تسنیم خبر رساں ادارے نے پاک فوج کے شعبہ تعلقات عامہ (آئی ایس پی آر) کے حوالے سے بتایا ہے کہ دہشت گردوں نے بارودی سرنگ سے سیکیورٹی فورسز کی گاڑی کو ہدف بنایا، جس کے نتیجے میں 6 سیکیورٹی اہلکار شہید ہوگئے۔ سیکیورٹی فورسز نے بلوچستان کے ضلع تربت کے قریب وکائی میں انٹیلی جنس معلومات کی بنیاد پردہشت گردوں کے ٹھکانے پر کارروائی کی۔ شہادت پانے والوں میں نائب صوبیدار گل شہادت (کرک)، نائیک لال خان (لکی مروت)، نائیک سجاد (لودھراں)، سپاہی انور (کرک)، نائیک نواز (تونسہ شریف) اور سپاہی سجاد (سیالکوٹ) شامل ہیں۔ آئی ایس پی آر کے مطابق دہشت گردوں نے سیکیورٹی فورسز کی گاڑی کو آئی ای ڈیز سے نشانہ بنایا اور سیکیورٹی فورسز کے اہل کاروں پر فائرنگ بھی کی، فائرنگ کے تبادلے میں 4 دہشت گرد بھی ہلاک ہوئے۔ واضح رہے کہ تربت میں اس سے قبل بھی متعدد حملے ہوتے رہے رہیں۔
