نیو یارک (ویب ڈیسک) وزیر اعظم عمران خان آئندہ چند روز میں امریکہ کے تین روزہ دورے پر روانہ ہونے والے ہیں، ایسے میں پاکستان نے ان سے پہلے ہی اپنا وہ ایجنٹ امریکہ بھجوا دیا ہے جس سے بھارت کو سب سے زیادہ ڈر لگتا ہے۔ پاکستان کی جانب سے امریکہ بھجوایا جانے والا جاسوس کوئی انسان نہیں ہے بلکہ ایک کبوتر ہے ۔ دراصل امریکی کامیڈین جیریمی میکلیلن پاکستان آ رہے ہیں تو ایسے میں انہوں نے اپنی بیٹی ’ جیول‘ کی حفاظت کے لئے انہیں ایک کھلونا کبوتر دیا ہے تاکہ بچی کا دل لگا رہے۔ انہوں نے ٹوئٹر پر اپنی تصویر شیئر کرتے ہوئے لکھا ’ جب میں گھر سے دور جا رہا ہوں تو ایسے میں جیول کی حفاظت کے لئے اپنے ٹاپ ایجنٹوں میں سے ایک بھجوانے پر میں پاکستان کا شکر گزار ہوں۔‘ خیال رہے کہ کچھ عرصہ پہلے بھارت کی جانب سے بارڈر پر کبوتر پکڑ کر دعویٰ کیا جاتا تھا کہ یہ پاکستانی جاسوس ہیں، بعض اوقات بھارت کی بارڈر سکیورٹی فورس نے پاکستانی غباروں کو بھی پکڑا ہے۔ بھارتی فوج کے ان مضحکہ خیز دعووں کے باعث امریکی کامیڈین جیریمی میکلیلن اکثر اوقات بھارتیوں کو ٹرول کرتے رہتے ہیں۔ امریکی کامیڈین نے پاکستان کے لئے روانہ ہونے سے پہلے پاکستان کی ایک اور روایت کو مدنظر رکھتے ہوئے اعلان کیا کہ وہ اگلے 4 گھنٹے میں پاکستان روانہ ہو رہے ہیں ، ایسے میں اگر کوئی شخص اپنے رشتہ داروں کے لئے کوئی چیز دینا چاہتا ہے تو بھجوادے۔
