پیرس (نامہ نگارخصو صی) پاکستان مسلم لیگ ن فرانس (یوتھ ونگ) کے صدر اصغر خان نے یس اردو نیوز کو اپنے بیان میں کہا ہے کہ قوم اور ملک شروع سے ہی اسٹیبلشمنٹ کے آہنی پنجوں کی زد میں ہیں جس وجہ سے ہمیشہ غریب عوام کا استحصال ہوا ہے ۔ اشرافیہ نے غریب عوام کو اپنے مقاصد کیلئے کبھی کسی رنگ میں جمہوریت دی تو کبھی کسی رنگ میں آمریت مسلط کردی۔
اس تمام کھیل کو اب بند ہونا چاہیے انشااللہ میاں محمد نواز شریف اپنی کشتیاں جلا کر نکلے ہیں اور وہ پنتیس یا پینتالیس خاندانوں کی جو لابی ہے اور جو ان کے مفادات کیلئے قانون سازی کرنے والے سرکاری نوکر شاہی ہے اس کو ختم کر کے دم لیں گے۔
انہوں نے کہا کہ آج کی دنیا میں حقیقی آزادی تو شاید کتابوں میں ہی ملتی ہے۔ البتہ آزادی کا کم از کم مطلب یہ ضرور ہے کہ ریاست کا ہر شہری اپنے آپ کو محفوظ سمجھے اور اسے یہ خوف نہ ہو کہ ریاست یا معاشرے میں موجود تنظیمیں اسے نقصان پہنچائیں گی‘ اس حوالے سے پاکستان میں ابھی بہت کام کرنے کی ضرورت ہے۔ ان کے خیال میں امن و امان کی صورتحال کو بہتر بنا کر، تعلیم کے ذریعے لوگوں کی سوچ بہتر بنا کراور معاشرے میں انصاف کی فراہمی کو یقینی بنا کر ہی شہریوں کی آزادی کا تحفظ یقینی بنایا جا سکتا ہے۔
عدلیہ جعلی مینڈیٹ پر خاموش تماشائی بنی ہوئی ہے۔ چیف جسٹس کو دوبارہ گنتی میں جیتنے پر الیکشن کمیشن کیخلاف نوٹس لینا چاہیے اور عدلیہ بلکہ اس ملک کے ہر فرد کا فرض بنتا ہے کہ اپنی اپنی بساط کے مطابق اسلامی تعلیمات اور دینی اقدار کے تحفظ کے لیے اپنا اپنا کردار ادا کرے۔ ان خلاف ورزیوں پر ہم تماشائی نہیں بن سکتے۔ یاد رکھیں ہماری یہ خاموشی، ہماری یہ لاتعلقی، ہماری یہ بے فکری ہماری نسلوں کو تباہ کرنے کے ساتھ ساتھ ہماری آخرت کی خرابی کا سبب بن سکتی ہے۔
