میکسیکو کے جنوب میں بحرِالکاہل میں آنے والے ملکی تاریخ کے شدید ترین زلزلے سے کم از کم 60افراد کی ہلاکت کی تصدیق ہوگئی ہے۔ امریکا کے ارضیاتی سروے کے مطابق زلزلے کی شدت ریکٹر اسکیل پر 8.2ریکارڈ کی گئی جو مقامی وقت کے مطابق جمعرات کی شب 11:49منٹ پر آیا۔
ملک کے صدر انریق پینا نیٹو نے اس کی شدت 8اعشاریہ 2 قرار دی ہے اور اسے میکسیکو کی تاریخ کا شدید ترین زلزلہ قرار دیا ہے۔زلزلے کا مرکز میکسیکو کی جنوبی ریاست چیاپاس کے مرکزی شہر تپاچولا سے 165 کلومیٹر مغرب میں لگ بھگ 70 کلومیٹر گہرائی میں تھا۔ زلزلے سے سیکڑوں عمارتیں لرز اٹھیں اور متعدد تباہ ہوگئیں ۔ زلزے سے اوکساکا اور چیاپاس کے علاقوں میں خاصی تباہی ہوئی ہے۔ زلزلے کے نتیجے میں ہمسایہ ملک گوئٹے مالا میں بھی ایک شحض ہلاک ہوا ہے۔ میکسیکن حکام کے مطابق زلزلہ اتنا شدید تھا کہ اس کے جھٹکے اس کے مرکز سے لگ بھگ ایک ہزار کلومیٹر دور واقع دارالحکومت میکسیکو سٹی میں بھی محسوس کیے گئے جہاں لوگ خوف کے مارے گھروں سے نکل آئے۔
زلزلے کے باعث دارالحکومت کے بعض علاقوں میں بجلی کی فراہمی معطل ہوگئی ہے جب کہ شہر کے مرکزی ہوائی اڈے کی کھڑکیوں کے شیشے ٹوٹ گئے۔ امریکا کے سونامی وارننگ سسٹم نے خبردار کیا ہے کہ زلزلے کے باعث وسطی امریکا کے کئی ممالک کے بحرالکاہل سے متصل ساحلی علاقوں سے بلند لہروں کے ٹکرانے کا خدشہ ہے۔ زلزلے کے نتیجے میں میکسیکو اور قریبی ممالک کے سمندر میں تقریباً تین میٹر بلند لہریں اٹھنے پر میکسیکو میں سونامی کی وارننگ جاری کی گئی جسے بعد میں واپس لے لیا گیا۔زلزلے کے جھٹکے مرکز سے ایک ہزار کلومیٹر تک کے علاقے میں ایک منٹ تک محسوس کیے جاتے رہے۔ زلزلے کی شدت کی وجہ سے عمارتیں لرز رہی تھیں اور لوگ گھروں سے باہر نکل آئے۔ ملک کے صدر نے اپنے بیان میں یہ بھی کہا ہے کہ 5 کروڑ افراد نے زلزلہ محسوس کیا اور ہلاکتوں کی تعداد بڑھ سکتی ہے۔مقامی حکام کے مطابق زلزلے سے اب تک 5 افراد کے ہلاک ہونے کی تصدیق ہوئی ہے۔
زلزلے سے سب سے زیادہ نقصان ریاست چیاپاس میں ہی ہوا ہے جس کے ساحل سیاحوں میں خاصے مقبول ہیں۔ ریاست میں اب تک تین افراد کے ہلاک ہونے کی اطلاع ہے۔ چیاپاس کے گورنر مینوئل ویلاسکو نے ریاست کے ساحلی علاقوں کے نزدیک رہنے والے افراد سے کہا ہے کہ وہ حفاظتی اقدام کے طور پر عارضی نقل مکانی کر جائیں۔ گورنر نے بتایا کہ شدید زلزلے سے ریاست کے کئی اسپتالوں کو بجلی کی فراہمی منقطع ہوگئی ہے جب کہ گھروں، اسکولوں اور سرکاری دفاتر کو نقصان پہنچا ہے۔چیاپاس کی پڑوسی ریاست ٹباسکو کے گورنر آرٹورو نونیز نے کہا ہے کہ زلزلے کے باعث ان کی ریاست میں بھی کئی عمارتوں کو نقصان پہنچا ہے اور اب تک 2بچوں کی ہلاکت کی تصدیق ہوئی ہے۔ چیاپاس میں شہری دفاع کے محکمے نے شہریوں کو خبردار کیا ہے کہ زلزلے کے بعد آفٹر شاکس آسکتے ہیں جس کے لیے وہ تیار ہیں۔
