خاتون کی بوائے فرینڈ کو سوٹ کیس میں ڈال کر رہا کروانے کی کوشش ناکام

برسلونا:  کہتے ہیں محبت اندھی ہوتی ہے اور اسے حاصل کرنے کیلئے انسان ہر حد پار کرنے کی ٹھان لیتا ہے۔ ایسا ہی کچھ برسلونا کی جیل میں دیکھنے کو ملا جہاں ایک خاتون بیٹی کے ہمراہ اپنے بوائے فرینڈ کو ملنے کیلئے آئی جس کو کار چوری کرنے کے جرم میں 9 سال اور 8 ماہ قید کی سزا سنائی گئی تھی۔ 25 سالہ خاتون نے ملاقات کے دوران موقع غنیمت سمجھا اور اپنے بوائے فرینڈ جوس انتونیو کو ایک سوٹ کیس میں بند کر کے جیل سے رہا کروانے کی کوشش کی۔

تاہم سیکورٹی گارڈ نے خاتون کو سوٹ کیس گھسیٹتے ہوئے دیکھا اور شک کی بنیاد پر خاتون کو روک کر سوٹ کیس چیک کیا تو اس میں خاتون کا بوائے فریںڈ آرام سے لیٹا ہوا تھا۔ سیکورٹی گارڈ نے جیل کی مزید نفری طلب کر کے خاتون اور اس کے بوائے فرینڈ جوس انتونیو کو دوبارہ جیل کی سلاخوں میں ڈال دیا۔