لاہور (نیوز ڈیسک ) معروف تجزیہ نگار اور کالم نویس جاوید چودھری نے کہاہے کہ شہباز شریف کی ڈیل کی باتیں بھی مجھے بتائی گئی تھیں لیکن جب میں نے چیئر مین نیب سے سوال کیاکہ ڈیل کی پیشکش کس کو کی اس سوال کا چیئرمین نیب نے جواب نہیں دیا۔اے آر وائی نیوز کے پروگرام ”آف دی ریکارڈ“میں گفتگو کرتے ہوئے جاویدچودھری نے کہا کہ چیئر مین نیب نے آصف زرداری کامذاق نہیں اڑایا تھا غالبا ان کی بیماری پر گفتگو کی ۔انہوں نے کہا کہ ہوسکتا ہے کہ نیب پر دباﺅپڑے تومعافی تک بات آجائے،شہباز شریف کی ڈیل کی باتیں بھی مجھے بتائی گئی تھیں لیکن جب میں نے چیئر مین نیب سے سوال کیاکہ ڈیل کی پیشکش کس کو کی تو اس سوال کا چیئرمین نیب نے جواب نہیں دیا۔انہوں نے کہاکہ حکومتی لوگوں کیخلاف ریفرنس پر چیئر مین نیب کا دوٹوک جواب تھا ، چیئرمین نیب نے انٹرویوسے متعلق میری کسی بات کو چیلنج نہیں کیا ۔ گزشتہ روز دنیا نیوز کے پروگرام ”آن دا فرنٹ “میں گفتگو کرتے ہوئے جاوید چودھری نے کہاکہ میں نے چیئر مین نیب سے کہا تھا کہ میں ایک صحافی ہوں اور ان باتوں کو ضرورلکھوں گا ضرورتو جواب میں چیئر مین نیب بڑی گرمجوشی سے میرا ہاتھ دباتے رہے اورکہا کہ میں کسی سے ڈرتا نہیں ہوں۔ انہوں نے کہا کہ میں نے جو کچھ اپنے کالم میں لکھاہے ، وہ بڑا واضح لکھا ہے اور میں اپنے ایک ایک لفظ کی ذمہ داری لیتا ہوں لیکن ایک بات جو میں واضح کرنا چاہتا ہوں کہ جب چیئر مین نیب نے آصف زرداری کے بارے میں کہا تھا کہ وہ گرین ٹی کا کپ اٹھاتے ہیں تو ان کا جسم کانپتاہے تو ساتھ ان کی بیماری کا ذکر بھی کیا تھا اور کہا تھا کہ وہ بیماری کے باوجود پیش ہوتے ہیں۔انہوں نے کہا کہ تھا کہ آصف زرداری کےخلاف ریفرنس بہت مضبوط ہیں اور وہ جلد جیل میں ہونگے ، حمزہ شہباز کی ضمانت کے حوالے سے چیئر مین نیب نے یہ نہیں کہا تھا کہ میں نے ان کا بنچ تبدیل کروایا ہے بلکہ یہ کہا تھا کہ حمزہ شہباز کے بنچ میں ججز تبدیل ہوچکے ہیں اور اب وہ مزید ضمانت لینے میں کامیا ب نہیں ہوسکیں گے ۔
