بالی ووڈ اداکارہ ودیا بالن نے ہندو انتہا پسندوں کے ڈرسے اسلام قبول کرنے والی معروف بھارتی شاعرہ کملا داس کی زندگی پربننے والی فلم سے کنارہ کشی کرلی ہے۔
بھارتی میڈیا رپورٹس کے مطابق بالی ووڈ کے ہدایتکارکمال الدین بھارتی شاعرہ کملا داس کی زندگی پر فلم بنانے جارہے ہیں اوراس کردارکی پیشکش ودیا بالن کو کی گئی تھی اور انہوں نے یہ قبول بھی کرلیا تھا تاہم اب اداکارہ نے یک دم اس فلم میں کام کرنے سے ہی منع کردیا ہے۔فلم کے ہدایت کار کا کہنا ہے کہ کملا داس کے کردارکے لیے ودیا بالن بہترین انتخاب تھیں، ودیا بالن پہلے اس کردارکے لیے بہت زیادہ پُرجوش تھیں اوراس کے لیے انہوں نے دیگر زیرتکمیل فلموں کے شیڈول بھی تبدیل کرائے تھے لیکن جب دیگرمعاملات کے لیے ان کے منیجرسے رابطہ کیا گیا تو اداکارہ نے پیشہ وارانہ اندازمیں فلم کا حصہ بننے سے معذرت کرلی۔کمال الدین نے اس خدشے کا اظہارکیا کہ ہندو انتہا پسند تنظیمیں کملا داس کی زندگی پربننے والی فلم کے خلاف انتہائی منفی رد عمل دے سکتی ہیں اورشائد اسی لیے ودیا بالن نے بھی اسی خوف سے فلم میں کام کرنے سے معذرت کی ہے۔واضح رہے کہ کملا داس کا تعلق بھارتی ریاست کیرالہ سے تھا، ان کے کالم اورشاعری بھارت بھر میں انتہائی مقبول تھی، انہوں نے 1999 میں اسلام قبول کرلیا تھا جس کے بعد انہوں نے اپنا نام بھی “کملا ثریا” رکھ لیا تھا جب کہ 2009 میں وہ 75 سال کی عمر میں وفات پاگئی تھیں۔
