کلکتہ: مردہ ماں کو تین سال تک فریج میں رکھ کر سرکاری پینشن وصول کرنے والے بیٹے کو بھارتی پولیس نے عدالت میں پیش کردیا۔
بین الاقوامی خبر رساں ایجنسی کے مطابق بھارتی پولیس نے جمعہ کی شب ہبراتا ماجمدار نامی شخص کو کلکتہ سے گرفتار کر کے گھر کے فریزر سے ماں کی تین سال پرانی لاش برآمد کرلی۔ ملزم تین سال سے اپنی مردہ ماں کے انگوٹھے کا نشان لگوا کر سرکاری پینشن وصول کررہا تھا تاہم مسلسل غیر حاضری پر بینک نے شک کا اظہار کرتے ہوئے پولیس کو اطلاع دی تھی۔
ملزم تین سال تک اپنی مردہ ماں کی ماہانہ تیس ہزار روپے پینشن وصول کرتا رہا تاہم پولیس کو اپنے بیان میں ملزم کا کہنا تھا کہ میری ماں ایک نہ ایک دن زندہ ہو جائے گی اسی انتظار میں اپنی ماں کی لاش کو فریزز میں محفوظ رکھا۔ پولیس نے ملزم کے ہمراہ رہنے والے 90 سالہ والد سے بھی پوچھ گچھ کی جنہیں واقعہ کا پورا علم تھا تاہم ناسازی طبیعت کے باعث انہیں گرفتار نہیں کیا
بہالہ پولیس کے ڈپٹی کمشنر نے عدالت کو بتایا کہ ملزم نے 2015 کو دل کے دورے کے سبب انتقال کر جانے والی 81 سالہ ماں کے اندرونی اعضاء کو نکال کر جسم کو کیمیکل لگا کر محفوظ کردیا تھا۔ ملزم چمڑا بنانے کا ماہر ہے اور مقامی فیکٹری میں بطور ’لیدر ٹیکنولوجسٹ‘ کام کرتا ہے اس لیے لاش کو حنوط کرنے والے کیمیکل سے واقفیت رکھتا ہے۔ ملزم نے لاش کو حنوط کرنے کے مکمل عمل کو نیشنل جیو گرافک کے ایک پروگرام سے سیکھا تھا۔
