دبئی: انٹرنیشنل کرکٹ کونسل نے ویسٹ انڈیز کیخلاف دوسرے ٹیسٹ میچ میں بال ٹمپرنگ کرنے پر سری لنکن کپتان دنیش چندی مل پر پابندی عائد کر دی ہے۔ دنیش چندی مل پر ایک ٹیسٹ میچ کی پابندی عائد کرنے کے علاوہ 100 فیصد میچ فیس کا جرمانہ اور 2 سسپنشن پوائنٹس بھی دئیے گئے ہیں۔
میچ ریفری جواگل سری ناتھ کا کہنا ہے کہ ”واقعے کی ویڈیو دیکھنے کے بعد یہ واضح ہے کہ دنیش چندی مل نے اپنے منہ سے کسی چیز سے پیدا ہونے والا مصنوعی مادہ نکال کر گیند پر لگایا جو کہ آئی سی سی کوڈ آف کنڈکٹ کی خلاف ورزی ہے۔“
آئی سی سی چیف ایگزیکٹو ڈیوڈ رچرڈسن نے کہا ”آئی سی سی میچ آفیشلز کے فیصلے کی پوری حمایت کرتی ہے جو ویڈیو فوٹیج دیکھنے کے بعد کیا گیا، اور ایسا کوئی بھی واقعہ پیش آنے پر یہی کیا جائے گا۔“
دنیش چندی مل دوسرے ٹیسٹ میچ کے دوسرے روز بال ٹمپرنگ کے الزام میں پابندی عائد ہونے کے باعث ویسٹ انڈیز کیخلاف تیسرے اور آخری ٹیسٹ میچ میں ٹیم کا حصہ نہیں ہو گے۔ سینٹ لوشیا میں کھیلے جانے والے میچ کے اختتام کے بعد اس معاملے پر سماعت ہوئی جس میں ویڈیو فوٹیج کو بطور ثبوت پیش کیا گیا۔ سماعت کے دوران سری لنکن ٹیم انتظامیہ اور میچ آفیشلز بھی موجود تھے جن کے سامنے چندی مل نے اپنے منہ سے مادہ نکال کر گیند پر لگانے کا اعتراف کیا تاہم وہ یہ نہ بتا سکے کہ انہوں نے یہ مادہ کس چیز سے پیدا کیا تھا۔
ویڈیو فوٹیج میں دیکھا جا سکتا ہے کہ دنیش چندی مل نے گیند پکڑنے کے بعد اپنی جیب سے کوئی چیز نکال کر منہ میں رکھی اور چند سیکنڈز کے بعد بڑی احتیاط سے انگلی کیساتھ مادہ نکال کر گیند پر لگاتے رہے اور باﺅلر کو ہدایات بھی جاری کرتے رہے۔ دو سسپنشن پوائنٹس کا مطلب ہے کہ کھلاڑی ایک ٹیسٹ میچ، یا دو ون ڈے انٹرنیشنل یا پھر دو ٹی 20 میچ نہیں کھیل سکے گا اور چونکہ دنیش چندی مل کا اگلا میچ بھی ٹیسٹ میچ ہی ہے اس لئے وہ ویسٹ انڈیز کیخلاف 23 جون سے شروع ہونے والے ڈے اینڈ نائٹ ٹیسٹ میچ میں حصہ نہیں لے سکیں گے۔ اس کے علاوہ چندی مل کے ’کھاتے‘ میں 4 ڈی میرٹ پوائنٹس بھی شامل کر دئیے گئے ہیں۔
