ہندو شخص نے لے پالک مسلمان لڑکی کی شادی کروا کر تاریخ رقم کردی

MH Kazmi May 1, 2019 1 min read

The Hindu man made a marriage amount of money to Muslim women

بھارت(مانیٹرنگ ڈیسک) ہندو مسلم تفرقات ایسے تفرقات ہیں جو کبھی ختم ہونے کا نام نہیں لیتے۔ دونوں مذاہب میں انتہا پسند گروپس موجود ہیں۔ ہندو مذہب کے انتہا پسند گروپس مسلمانوں کا نام تک برداشت نہیں کرتے جبکہ مسلم انتہا پسند گروپس میں بھی ہندو مذہب سے تعلق رکھنے والوں کو نفرت بھری نظروں سے دیکھا جاتا ہے لیکن اس دنیا میں کئی ایسے لوگ بھی موجود ہیں جس کے لیے مذہب کی تقسیم کوئی معنی نہیں رکھتی ۔ایسے ہی بھارت میں بھی ایک شخص نے مسلمان لڑکی کو گود لیا لیکن اس کا مذہب تبدیل نہیں کیا اور اسلامی تعلیمات کے مطابق اس کی پرورش کی اور جوان ہونے پر اسلامی تعلیمات کی رو پر عمل کرتے ہوئے اسلامی طریقے سے لڑکی کا نکاح کروا دیا۔ تفصیلات کے مطابق مدنان نامی ہندو شخص نے خدیجہ نامی لڑکی کو تب گود لیا جب وہ 13 سال کی تھی۔مدنان نے خدیجہ کو گود لیا اور اسے اپنے گھرلے آیا،مدنان کی پہلی شادی سے اس کے دو بیٹے تھے ۔خدیجہ کے گھر آنے پر مدنان نے کہا کہ مجھے ہمیشہ سے ہی بیٹی کی خواہش تھی جو خدیجہ نے پوری کردی۔اگرچہ مدنان اور اس کے اہل خانہ ہندو مذہب سے تعلق رکھتے تھے لیکن مدنان کے اہل خانہ نے خدیجہ سے مذہب تبدیل کرنے سے متعلق نہ تو کوئی بات کی اور نہ ہی مذہب تبدیلی کے لیے اس پر دباؤ ڈالا اور اسلامی تعلیمات کے تحت ہی خدیجہ کی پرورش کی، یہی نہیں بلکہ گھر میں ایک کونا خدیجہ کے لیے مختص تھا جہاں خدیجہ نماز ادا کرتی اور اپنی عبادات کرتی تھی۔خدیجہ کو مدنان کے گھر میں اپنے لیے حلال کھانا بنانے کی اجازت بھی تھی۔ مدنان نے خدیجہ کی شادی کروانے کی ذمہ داری اُٹھائی اور اس کے لیے ایک اچھا لڑکا تلاش کرنے کے بعد اسے اسلامی طریقے سے بیاہ دیا اور شادی کے تمام اخراجات بھی خود اُٹھائے۔ مدنان نے خود ایک مسجد کے امام سے رجوع کیا تاکہ وہ خدیجہ کا نکاح پڑھا سکیں۔ مدنان کے دونوں بیٹے عمان اور متحدہ عرب امارات میں مقیم ہیں، اور وطن واپسی پر اپنی بہن کے نئے گھر کا دورہ کرنے کا ارادہ رکھتے ہیں۔مدنان اور اس کی اہلیہ کا کہنا ہے کہ ہم زندگی بھر خدیجہ کا خیال رکھیں گے۔ مدنان اور اس کے اہل خانہ کے اس بے لوث اقدام سے مذہبی ہم آہنگی میں اضافہ ہوا ہے ۔ شہریوں کا کہنا ہےکہ خدیجہ کی کہانی مذہبی ہم آہنگی کی تازہ ترین مثال ہے جو یہ ظاہر کرتی ہے کہ دونوں مذاہب میں آج بھی کچھ ایسے لوگ موجود ہیں جو صرف انسانیت کا جذبہ رکھتے ہیں اور ایک دوسرے کے مذہب کا احترام کرتے ہیں۔