ریاض: سعودی عرب کے مفتی اعظم عبدالعزیز الشیخ نے منشیات کی روک تھام پر زور دیتے ہوئے کہا ہے کہ منشیات کے خلاف جنگ کرنا جہاد ہے۔
عرب ٹی وی کے مطابق ریاض میں منعقد منشیات کی روک تھام کے حوالے سے سیمینار پر خطاب کرتے ہوئے سعودی مفتی اعظم عبدالعزیزالشیخ کا کہنا تھا کہ منشیات کا استعمال انسان کی عقل اور صلاحیتوں کو تباہ کردیتا ہے لہذا اس زہر کو روکنے کے لیے تمام افراد کو اپنا کردار اداکرنا ہوگا۔ انہوں نے کہا کہ منشیات کا استعمال صرف انسانیت کی تباہی کا راستہ ہے لہذا اس کے خلاف جنگ کرنا جہاد ہے۔ سعودی مفتی اعظم نے منشیات کے نقصانات کے بارے میں عوام میں آگاہی پھیلانے کی ضرورت پر زور دیتے ہوئے کہا کہ علماء اکرام، میڈیا اور معاشرے کے دیگر طبقات قانون نافذ کرنے والے اداروں کے ساتھ مل کر منشیات کے کاروبار کو روکنے میں اپنا تعاون کریں۔
