کراچی(ویب ڈیسک) جناح ہسپتال جاتے ہوئے راستے میں لاپتا ہونے والی لڑکی کے معاملے کا ڈراپ سین ہوگیا، لڑکی ہسپتال پہنچی ہی نہیں تھی اور اس نے غائب ہوکر پڑوسی سے پسند شادی کرلی تھی۔ ایکسپریس کے مطابق دو جون کو پاک کالونی کے علاقے پرانا گولیمار کی رہائشی لڑکی تبسم اپنی بہن کے ہمراہ گھر سے جناح اسپتال جانے کا کہہ کر نکلی اور لاپتا ہوگئی تھی تاہم اس کی بہن جناح ہسپتال پہنچ گئی تھی۔لاپتا لڑکی کے اہل خانہ نے موقف اختیار کیا تھا کہ تبسم جناح اسپتال کے الٹرا ساؤنڈ ڈپارٹمنٹ سے لاپتا ہوئی جب کہ جناح اسپتال میں نصب سی سی ٹی وی کیمروں کی ریکارڈنگ چیک کی گئی تو معلوم ہوا کہ تبسم اسپتال پہنچی ہی نہیں اور صرف اس کی بہن کو جناح اسپتال داخل ہوتے ہوئے دیکھا گیا۔پولیس کے مطابق بدھ کی شب لاپتا ہونے والی لڑکی نے اپنے گھر والوں سے رابطہ کیا اور اس نے بتایا کہ اس نے پسند کی شادی کرلی ہے۔ صدر پولیس کے مطابق لاپتا لڑکی نے اپنے پڑوسی شوکت کے ساتھ شادی کرلی ہے اور نکاح نامہ بھی پیش کردیا ہے، لڑکی کے اہل خانہ نے واقعہ سے متعلق مقدمہ بھی درج نہیں کرایا تھا۔دوسری جانب خبر کے مطابق چوتھی شادی کرنے کی کوشش کرنے والے شخص کو پہلی بیوی نے عین موقع پر پکڑ کر اسی عدالت میں زبردست درگت کا نشانہ بنایا، جہاں وہ کورٹ میرج کی منصوبہ بندی کررہا تھا۔92 نیوز کے مطابق یہ واقعہ بھارتی ریاست بہار کے ضلع ارریہ کی عدالت میں پیش آیا جہاں ممتاز نامی شخص شادی کے لیے پہنچا تھا، حالانکہ اس کا تعلق ریاست کے دوسرے ضلع بیتیاہ سے تھا۔ ہندوستان ٹائمز کی رپورٹ کے مطابق 30 سال سے زائد عمر کے ممتاز ارریہ سے تعلق رکھنے والی ایک خاتون سے شادی کرنے کی کوشش کررہا تھا، جس دوران اس کی پہلی بیوی عدالت پہنچ گئی اور پھر فلموں جیسا ڈرامہ حقیقت میں دیکھنے میں آیا۔
