عطائیوں اور جعلی پیروں سے علاج کرانے والے ہوجائیں ہوشیار … جھنگ سے دل دہلا دینے والی خبر آگئی
جھنگ: (سبطین عباس ساقی) عطائی و جعلی پیر کے ہاتھوں سات ماہ کے بچے کی مبینہ موت، دوائی پیتے ہی بچے نے تڑپ تڑپ کر موقع پر جان دے دی، ورثاء کا الزام۔ ماں صدمے سے بےہوش۔
تفصیلات کے مطابق گزشتہ روز جھنگ کا رہائشی صفدر اور اپنی بیوی اور والدہ کے ہمراہ اپنے سات ماہ کے بچے دانش کو نواحی علاقہ کوٹ آرائیاں میں احمد نامی مبینہ جعلی حکیم و پیر کے پاس علاج کیلئے لایا تو اس نے مبینہ طور پر بچہ کو کوئی شربت بنا کر پلایا جس سے وہ موقع پر ہی دم توڑ گیا، بچے کے ساتھ آئی اسکی ماں اور دادی کا روتے ہوئے کہنا تھا کہ عطائی نے دوائی پلاتے وقت بچے کی ناک بھی دبا رکھی تھی تاکہ دوا منہ سے باہر نہ نکل سکے، بچہ کی اس طرح اچانک موت پر اسکی ماں صدمے سے بےہوش بھی ہوگئی۔ تھانہ اٹھارہ ہزاری پولیس نے موقع پر پہنچ کر عطائی و جعلی پیر احمد کا سامان قبضہ میں لے کر اسے تھانہ منتقل کردیا اور مزید کارروائی شروع کردی۔
