پیرس : سرینا ولیمز اور نووک جوکووک کی ٹینس میں بادشاہت برقرار ہے، ورلڈ فیڈریشن کی جانب سے جاری تازہ ترین رینکنگ میں دونوں سرفہرست ہیں۔
ومبلڈن ٹائٹل جیتنے والی امریکی اسٹار کے پوائنٹس کی تعداد 13 ہزار109 ہے، مینز میں سرفہرست سرب کھلاڑی نووک جوکووک نے 13 ہزار 845 پوائنٹس حاصل کیے ہوئے ہیں۔ اٹلانٹا اوپن ٹائٹل جیتنے پر اسپینش رافیل نڈال کو ایک درجے ترقی مل گئی اور وہ 9ویں نمبر پر آگئے ہیں۔
تفصیلات کے مطابق ورلڈ ٹینس فیڈریشن کی جانب سے جاری کردہ تازہ ترین رینکنگ کے مطابق 21 گرینڈ سلم ٹائٹل فاتح سرینا ولیمز بدستور نمبر وں کا تاج سر پر سجائے ہوئے ہیں۔
رواں ماہ کے آغاز میں کہنی کی انجری کے سبب سوئیڈش اوپن سے دستبردار ہونے کے باوجود 33 سالہ امریکی اسٹار کے پوائنٹس کی کٹوتی نہیں ہوئی، انھوں نے حال ہی میں گاربین مگروزا کو ومبلڈن سنگلز فائنل میں شکست دی جس کی بدولت ان کے پوائنٹس کی تعداد 13 ہزار 109 ہوگئی ہے، روسی اسٹار ماریا شراپووا 6 ہزار 490 پوائنٹس کے ساتھ دوسری پوزیشن پر موجود ہیں رومانین سیمونا ہالیپ اور جمہوریہ چیک کی پیٹرا کویٹووا ان کا پیچھا کررہی ہیں۔
ڈنمارک کی کیرولین ووزینسکی، سربیئن اینا ایوانووک، پولش اگنیسکا ریڈوانسکا، جمہوریہ چیک کی لوسی سفارووا، اسپینش گاربین مگروزا اور کارلا سواریزنیوارکی پوزیشن میں بھی کوئی ردوبدل نہیں ہوا جس کی بدولت وہ بدستور 6 سے 10 ویں نمبر پر موجود ہیں۔ جمہوریہ چیک کی کیرولین پلسکووا نے روسی ایکٹرینا ماکارووا کوایک درجے نیچے دھکیل کر 11 ویں پوزیشن حاصل کرلی، سوئس اسٹار ٹیمیا بیسنزکی نے جرمن اینجلیک کیربر سے کو 13 ویں مقام سے محروم کردیا۔
سرینا کی بہن وینس ولیمزکا 15 ویں پوزیشن پر قبضہ برقرار ہے ، اطالوی سارا ایرانی نے جرمن آندریا پیٹکووک سے 16 ویں پوزیشن چھین لی، امریکی میڈیسن کیز، بیلاروسی وکٹوریہ آذرنیکا اور یوکرین کی ایلینا سویٹولینابدستور18، 19 اور 20 ویں درجے پر براجمان ہیں۔
دوسری طرف مینز رینکنگ کی ابتدائی 7 پوزیشنز میں کوئی تبدیلی نہیں ہوئی، 13 ہزار 845 پوائنٹس کے ساتھ نووک جوکووک بدستور پہلے نمبر پر ہیں، سوئس راجر فیڈرر، برطانوی اینڈی مرے، سوئس اسٹینسلاس واورنیکا، جاپانی کائی نیشکوری، جمہوریہ چیک کے ٹوماس بریڈیچ، اسپینش ڈیوڈ فیرر بھی بدستور دوسرے سے ساتویں پوزیشن پر ہیں۔
کروشین میرن کلک اور رافیل نڈال ایک، ایک درجہ بہتری کے ساتھ آٹھویں اور نویں نمبرز پر پہنچ گئے،کینیڈا کے میلوس راؤنک2 زینے نیچے اتر کر 10 ویں جبکہ فرانس کے جائلز سیمون، جوئے ولفریڈ سونگا اور رچرڈ گیسکوئٹ بدستور 11،12 اور 13 ویں درجے پر موجود ہیں۔
جنوبی افریقی کیون اینڈرسن ایک درجہ برتری کے ساتھ 14 جبکہ بیلجیئم کے ڈیوڈ گوفن ایک درجہ تنزلی سے 15 ویں مقام پر آگئے۔ بلغارین گریگور دیمیتروف اور فرنچ جائلز مونفلز 16 اور 17 ویں پوزیشن پر رہے، امریکی جون اسنر ایک درجہ ترقی کے ساتھ 18 اور اسپینش فیلکیانو لوپز ایک درجہ تنزلی سے 19 ویں پوزیشن پر پہنچ چکے، سربیا کے وکٹر ٹروسکی بدستور ٹاپ 20 کے آخری زینے پر بیٹھے ہیں۔
