لاہور( مانیٹرنگ ڈیسک ) اسحاق ڈار کا گھر قبضے میں لینے کے بعد نیب لاہور نے شریف فیملی کو ایک اور جھٹکا دے ڈالا ہے، ایسا کام کر دکھایا ہے کہ پوری فیملی میں ہلچل مچی ہوئی ہے۔ پبلک نیوز کےمطابق نیب لاہور نے لاہور میں شریف گروپ آف کمپنیز کے آفس سے سارا ریکارڈ قبضے میں لے لیا ہے ،ذرائع کے مطابق قبضے میں لیے جانے والے ریکارڈ میں بے نامی کمپنیاں بھی شامل ہیں،نیب نے چوہدری شوگر مل، رمضان شوگر مل، حمزہ بورڈ، شریف فیڈز سمیت ایک درجن سے زاید کمپنیون کا ریکارڈ تحویل میں لیا ہے۔ذرائع کا کہنا ہے کہ متعدد بے نامی کمپنیوں کا ریکارڈ بھی تحویل میں لیا گیا ہے۔ خیال رہے کہ کچھ روز قبل نیب عدالت کے حکم پر عملدرآمد کرتے ہوئے اسسٹنٹ کمشنر ماڈل ٹاؤن لاہور ذیشان نصراللہ رانجھا اور ایل ڈی اے کے اسٹیٹ آفیسر نے سابق وزیر خزانہ اسحاق ڈار کا گھر اپنی مدعیت میں تحویل میں لیا۔ 4 کنال 17 مرلے پر اسحاق ڈار نے اپنے اس گھر کو ہجویری بنگلہ کا نام دے رکھا ہے۔اے سی ماڈل ٹاؤن ذیشان نصراللہ رانجھا کے مطابق اسحاق ڈار کا گھر قانونی کارروائی مکمل کرتے ہوئے قبضہ میں لیا گیا ہے جبکہ نیب زرائع نے بتایا کہ شریف فیملی کے مبینہ فرنٹ مین اور منی لانڈرنگ میں ملوث ہونے پر نیب نے اسحاق ڈار کو اشتہاری بھی قرار دیا ہوا ہے کیونکہ اسحاق ڈار نیب کے طلب کیے جانے پر پیش نہیں ہوئے اور لندن فرار ہو گئے جبکہ ان کی واپسی کے لیے بھی نیب نے کارروائی شروع کر رکھی ہے۔واضح رہے کہ عدالتی حکم پر اسحاق ڈار کے بینک اکاؤنٹس اور کمپنیاں بھی منجمد کی جاچکی ہیں۔
