کراچی ……سیکیورٹی سے متعلق اہم قومی ادارے نے قومی ایکشن پلان پر اندرون سندھ عمل درآمد نہ ہونے پر تشویش کا اظہار کیا ہے۔رپورٹ میں ادارے کا کہنا ہےکہ اندرون سندھ قومی ایکشن پلان کا وجود نظر نہیں آتا۔کراچی سمیت صوبے میں امن کی بحالی کے لئے پلان کا دائرہ کارمزید موثر طریقے سے پھیلانا ضروری ہے ۔
ذرائع نے جیو نیوز کو بتایا کہ سیکیورٹی سے متعلق قومی ادارے کی رپورٹ میں کہا گیا ہے کہ اندرون سندھ قومی ایکشن پلان کا وجود نظر نہیں آتا۔ کالعدم تنظیموں نے یہاں محفوظ پناہ گاہیں بنالی ہیں جبکہ پلان پرعمل نہ ہونا سیکیورٹی کیلیے بڑا خطرہ ہے۔رپورٹ کے مطابق کراچی سمیت صوبے میں مکمل امن کیلیے اندرون سندھ پناہ گاہیں اور سلیپر سیل ختم کرنا ہوں گے۔رپورٹ میں بتایا گیاہے کہ حیدرآباد جیل پر حملے کی منظم منصوبہ بندی کرلی گئی تھی انٹیلی جنس اداروں کی فوری کارروائی سے حملے کا منصوبہ ناکام ہوا۔ رپورٹ میں وفاق و صوبائی حکام پر زور دیا گیا ہے کہ نیشنل ایکشن پلان کا اندرون سندھ تک دائرہ کار موثر طریقے سے بڑھانا ضروری ہے۔
