ممبئی (ویب ڈیسک ) بالی وڈ کی معروف اور مایہ ناز پروڈیوسر ایکتا کپور کے گھر ننھے مہمان کی آمد ہوئی۔ تفصیلات کے مطابق بالی وڈ کے پروڈیوسر ایکتا کپورسروگیسی کے ذریعے ماں بن گئیں۔ ان کے بیٹے کی پیدائش رواں ماہ 27 جنوری کو ہوئی۔ یاد رہے کہ ایکتا کپور کے بھائی اور بالی وڈ اداکار تشار کپور
بھی تین برس قبل سروگیسی کے ذریعے بیٹے کے والد بنے تھے۔میڈیا رپورٹس کے مطابق بالی وڈ پروڈیوسر ایکتا کئی بارکہہ چکی ہیں کہ وہ شادی کرنے میں دلچسپی نہیں رکھتیں تاہم تشار کے بیٹے ’لکشیا‘ کی پیدائش کے بعد ایکتا کپور نے بھی ماں بننے کی خواہش کا اظہار کیا تھا۔ ایکتا کپور کا کہنا تھا کہ جب میں ماں بننے کے لیے ذہنی طور پر تیار ہوں گی اور یہ ذمہ داری اُٹھانے کے قابل ہوں گی تو ضرور ماں بنوں گی اور اب ان کے گھر سرو گیسی کے ذریعے بیٹے کی پیدائش ہوئی ہے۔خیال رہے کہ بالی ووڈ میں سروگیسی کے ذریعے بچوں کی پیدائش کا طریقہ عام ہوتا جارہا ہے ۔اسی طریقہ کار کے تحت بالی وڈ کے کنگ خان شاہ رخ خان، مسٹر پرفیکشنسٹ عامرخان، ہدایت کار کرن جوہر اور بالی وڈ اداکارہ و ماڈل سنی لیون بھی والدین کے عہدے پر فائز ہوئے۔ سروگیسی کا تصور بالی وڈ میں کافی حد تک عام ہے اور اسے معیوب نہیں سمجھا جاتا ، اسی لیے ایکتا کپور نے بھی ماں بننے کے لیے اسی طریقہ کار کا سہارا لیا۔واضح رہے کہ ایکتا کپور کا شمار بالی وڈ کی کامیاب ترین پروڈیوسرز میں ہوتا ہے ۔ ایکتا کپور نے ٹی وی انڈسٹری میں ’’کیونکہ ساس بھی کبھی بہو تھی‘‘، ’’کہانی گھر گھر کی‘‘سمیت متعدد کامیاب سیریلز پروڈیوس کیے جو ان کی وجہ شہرت بنے۔ ایکتا کپور کی بھارتی ٹی وی پر گذشتہ کئی برس سے حکمرانی کی ہے، بعد ازاں انہوں نے بالی ووڈ میں بھی کئی سُپر ہٹ فلمیں دیں اور اب ویب سیریز کے ذریعے وہ انٹرنیٹ کی دنیا پرچھائی ہوئی ہیں۔
