ممبئی (جیوڈیسک) دبنگ خان نے باربی گرل کترینہ کیف کے ساتھ کرم کرنے سے صاف انکار کردیا ہے جس کے بعد فلم ’’سلطان‘‘ میں اب کترینہ کی جگہ دپیکا پڈوکون اپنی اداکاری کے جوہر دکھائیں گی۔
بالی ووڈ کے سپر اسٹار سلمان خان اور کترینہ کیف کے درمیان دوریوں کا تو سب کو علم ہے لیکن ان دوریوں نے شاید اختلافات کا روپ دھار لیا ہے جس کا اندازہ اس بات سے لگایا جا سکتا ہے کہ دبنگ خان نے انڈسٹری میں باربی گرل کہلانے والی کترینہ کیف کے ساتھ کام کرنے سے صاف انکار کر دیا ہے۔
بھارتی میڈیا کے مطابق سلمان خان نے اپنی نئی آنے والی فلم ’’سلطان‘‘ میں کترینہ کیف کو کاسٹ کیے جانے پر شدید ناراضگی کا اظہار کیا جس کے بعد فلم کے ہدایت کار نے کترینہ کے بعد دپیکا کو کاسٹ کر لیا ہے۔
واضح رہے کہ 2 روز قبل بھارتی میڈیا کو انٹرویو میں کترینہ کیف نے ان ہی سلمان خان کی تعریفوں کے پل باندھے تھے جس میں انہوں نے دبنگ خان کو انتہائی متاثر کن شخصیت قرار دیا تھا۔
