نیویارک …..امریکی میڈیا کی نامور شخصیت رُپرٹ مرڈوک نے چوتھی شادی کی ٹھان لی اور84 سال کی عمر میں سابق سپر ماڈل جیری ہال سے منگنی کرلی، جوڑی کو دنیا کی چوتھی با اثر جوڑی قرار دیا جارہا ہے۔
آسٹریلیا اور امریکی میڈیا کی نامور شخصیت رُپرٹ مرڈوک نے سابق سپر ماڈل جیری ہال سے منگنی کرلی ہے، جوڑی کو دنیا کی چوتھی با اثر جوڑی قرار دیا جارہا ہے، مرڈوک کی یہ چوتھی شادی ہوگی۔ امریکا کے میڈیا ٹائیکون رُپرٹ مرڈوک نے 84 سال کی عمر میں پھر شادی کی ٹھان لی، اس بار ان کا انتخاب ہیں ، سابق امریکی سپر ماڈلجیری ہال جو عمر کی 60 بہاریں دیکھ چکی ہیں ۔رُپرٹ مرڈوک کی منگنی کی خبر ان ہی کے ایک اخبار نے شائع کی ہے، خاندان کے ترجمان نے منگنی کا اعلان کرتے ہوئے بتایا کہ مرڈوک اور جیری ہال کی دوستی چند ماہ پہلے ہی ہوئی اور وہ شادی کرکے خوشگوار زندگی گزارنے کیلئے پرجوش ہیں۔رپرٹ مرڈوک اور جیری ہال نے ایک سال قبل گولڈن گلوب ایوارڈ کی تقریب میں شرکت بھی کی تھی۔مرڈوک نے اس سے پہلے تین شادیاں کیں، ان کی پہلی بیوی پیٹریشیا بوکر کا تعلق آسٹریلیا سے تھا، دونوں کی شادی1956ء میں ہوئی، پیٹریشیا سے مرڈوک کی ایک بیٹی پروڈینس ہیں۔دوسری شادی گلاسگو کی صحافی Anne Torv سے ہوئی جو 32 برس برقرار رہی، این سے مرڈوک کے تین بچے، الیزبتھ، لیچلن اور جیمز ہیں۔رُپرٹ مرڈوک نے تیسری شادی چینی نژاد بزنس وومن وینڈی ڈینگ سے کی، ان کے بچوں کے نام گریس اور کلوو ہیں،دونوں کا 14برس کا ساتھ2013ءمیں ختم ہوا ۔فوربز میگزین کے مطابق رُپرٹ مرڈوک خاندان کی مجموعی دولت 12 ارب ڈالر سے زیادہ ہے،انہوںنے بائیس سال کی عمر میں اپنے والد کے ایڈیلیڈ میں 2 اخبارات سنبھالے اور اب وہ پانچ ملکوں میں ایک سو 20 اخبارات، رسائل وغیرہ کے مالک ہیں۔ ان میں دی سن ، ٹائمز اور ہارپر کولنز جیسا بڑا اشاعتی ادارہ بھی شامل ہے۔ مرڈوک خاندان نیوز کورپ جیسے بڑے ادارے کا مالک ہے ، امریکا میں فوکس ٹی وی نیٹ ورک ، اور 21st سنچری فوکس بھی مرڈوک خاندان کی ملکیت ہے، اس کے علاوہ اسکائی ٹی وی نیٹ ورک کے شیئرز میں بڑا حصہ ہے۔جیری ہال 1956ء میں ٹیکساس میں پیدا ہوئیں،70 کی دہائی میں ماڈل کی حیثیت سے شناخت بنائی، انہوں نے 1990ءمیں مائیک جیگر سے شادی کی اور1999ء میں علاحدگی ہوگئی۔
