نئی دہلی: مہاجرین کی تعداد 40 ہزار، بعض کے پاکستانی دہشتگرد تنظیموں سے رابطے، حکومت انہیں ڈی پورٹ کرنا چاہتی ہے، مداخلت نہ کیجائے: سپریم کورٹ میں استدعا
بھارت کی مرکزی حکومت نے روہنگیا پناہ گزینوں کے معاملے پر سپریم کورٹ میں ایک بیان داخل کراتے ہوئے کہا ہے کہ روہنگیا پناہ گزینوں کا غیر قانونی طریقے سے بھارت آکر رہنا ملکی سلامتی کیلئے سنگین خطرہ ہے ، اس لئے حکومت انہیں ڈی پورٹ کرنا چاہتی ہے۔ غیر ملکی نیوز ایجنسی کے مطابق مرکزی حکومت کی جانب سے جمع کرائے گئے پندرہ صفحات پر مشتمل بیان میں کہا گیا ہے کہ غیر قانونی روہنگیا تارکین کی تعداد 40 ہزار سے زائد ہے ، بعض کے پاکستانی دہشتگرد تنظیموں سے رابطوں کی اطلاعات سکیورٹی ادارے دے چکے ہیں۔ حلف نامے میں روہنگیا پناہ گزینوں کو کسی صورت ملک میں رہنے کی اجازت نہ دینے کی اپیل کرتے ہوئے عدالت سے اس معاملے میں مداخلت نہ کرنے کی استدعا کی گئی ہے ۔ عدالت نے مرکزی حکومت کا موقف سننے کے بعد سماعت 3 اکتوبر تک ملتوی کر دی۔
