اسلام آباد: پاکستان کے پہلے ریموٹ سنیٹک سیٹلائٹ (پی آر ایس ایس 1) نے باضابطہ کام شروع کردیا ہے، چین نے مکمل سیٹلائٹ کنٹرول پاکستان کے حوالے کردیا۔
منگل کو پاکستان کے پہلے ریموٹ سنیٹک سیٹلائٹ (پی آر ایس ایس 1) سے باضابطہ کام شروع کردیا، پی آر ایس ایس ون کو 9 جولائی کو چین سے خلا میں بھیجا گیا تھا جس کا مکمل سیٹلائٹ کنٹرول گذشتہ روز پاکستان کے حوالے کردیا گیا ہے، اس پر صدر مملکت ممنون حسین اور نگراں وزیراعظم ناصرالملک نے سپارکو کے انجینئرز اور سائنسدانوں کو یہ اہم سنگ میل حاصل کرنے پر مبارکباد دی، اپنے مشترکہ بیان میں دونوں کا کہنا تھا کہ یہ اہم سنگ میل ملک کے 71ویں یوم آزادی پر حاصل کیا گیا ہے۔
انہوں نے کہا کہ سیٹلائٹ کا خلا میں بھیجا جانا اور فعال ہونا ہمارے سپیس انجینئرز اور متعلقہ تکنیکی افراد کے اعتماد میں اضافہ کرے گا، صدر مملکت اور وزیراعظم نے مزید کہا کہ یہ قدم پاکستان کی سماجی اور معاشی ترقی میں اہم کردار ادا کرے گا۔ انہوں نے کہا کہ اس اہم سنگ میل کو حاصل کرنے پر پاکستانی قوم کو فخر ہے، اس سنگ میل نے پاکستان کو ان ممالک کی صف میں شامل کردیا ہے جن کے پاس ریموٹ سنیٹک سیٹلائٹ موجود ہیں۔
