بلوچستان کے ضلع قلات میں ایف سی کے سرچ آپریشن کے دوران فائرنگ کے تبادلے میں تین شرپسند ہلاک ہوگئے ، شر پسندوں کے تین ٹھکانے بھی تباہ کردئیے گئے ،آواران میں مسلح افراد کی فائرنگ سے سکیورٹی فورسز کاایک افسر زخمی ہوگیا ۔
ترجمان ایف سی کے مطابق قلات کے علاقے سومالو میں ایف سی اور حساس اداروں نے شرپسندوں کی موجودگی کی اطلاع پر سرچ آپریشن کیا ، آپریشن کے دوران فورسزسے فائرنگ کے تبادلے میں تین شر پسند ہلاک ہوگئے جبکہ فورسز نے شرپسندوں کے تین ٹھکانے بھی تباہ کردئیے ۔علاقے میں سرچ آپریشن تاحال جاری ہے ۔
دوسری جانب سکیورٹی ذرائع کے مطابق آواران کےعلاقے جھاو میں نامعلوم مسلح افراد کی سکیورٹی فورسزکی گاڑی پر فائرنگ کےنتیجے میں سکیورٹی فورسز کاایک افسر زخمی ہوگیا ۔
فائرنگ کےبعد حملہ آور فرار ہوگئے تاہم فورسز نے علاقے کو گھیرے میں لے کر سرچ آپریشن شروع کردیا ۔
