لاہور (یس ڈیسک) پنجاب حکومت کے ترجمان زعیم قادری نے کہا ہے کہ تحریک انصاف نے ثابت کردیا ہے کہ وہ سیاسی نہیں دہشت گرد جماعت ہے اور عمران خان اس دہشت گرد تنظیم کے سربراہ ہیں۔
پنجاب حکومت کے ترجمان کا کہنا تھا کہ لاہور ایک پُرامن شہر ہے اوراس کے شہری تحریک انصاف کی ہڑتال میں شریک نہیں ہوئے، عمران خان میں احساس جرم کی ذرا سی بھی رمق ہوتی تو شہریوں کو تشدد کا نشانہ نہ بنایا جاتا۔ ترجمان کا کہنا تھا کہ گزشتہ روز تحریک انصاف نےشہر کے 18 مقامات کی نشاندہی کی لیکن تحریک انصاف کے کارکنوں نے 40 مقامات پر احتجاج کیا۔
اس کے علاوہ تحریک انصاف نے اس بات کی یقین دہانی کرائی تھی کہ احتجاج کے دوران کوئی پرتشدد کارروائی نہیں کی جائے گی، حکومت یہ سمجھی کہ شائد پہلی مرتبہ تحریک انصاف سچی بات کررہی ہے لیکن ایک مرتبہ پھر لاہور کے ایک کروڑ 20 لاکھ افراد کے حقوق پر ڈاکا ڈالا گیا جب کہ پی ٹی آئی کی جانب سے دھوکا کھانے پر حکومت عوام سے معذرت خواہ ہے۔
ترجمان پنجاب حکومت کا کہنا تھا کہ تحریک انصاف کی جانب سے پرامن جماعت کے دعوؤں کی قلعی کھل گئی ہے اور ہم سمجھتے تھے کہ پی ٹی آئی سیاسی جماعت کی طرح رویہ اختیار کرے گی لیکن انہوں نے یہ ثابت کیا کہ وہ ایک سیاسی نہیں دہشت گرد جماعت ہے اور عمران خان اس دہشت گرد تنظیم کے سربراہ ہیں۔
ترجمان کا کہنا تھا کہ حکومت کے رویے کو کمزوری نہ سمجھا جائے، جلاؤ گھیراؤ اور سڑکیں بلاک کرنے والوں کے خلاف قانون حرکت میں آچکا ہے، ٹی وی ویڈیوز اور دیگر شواہد کی مدد سے تمام دہشت گردوں اور پرتشدد کارروائیوں میں ملوث افراد کو کڑی سزا دی جائے گی،لاہور ہائی کورٹ کے فیصلے کے بعد مال روڈ پر احتجاج اور سپریم کورٹ کے گزشتہ روز جاری کئے گئے فیصلے کے بعد عمران خان قوم سے معافی مانگ کر اسمبلیوں میں اپنے مینڈیٹ کے مطابق واپس جائیں۔
