دبئی میں پی ایس ایل ٹو کی ٹرافی کی رونمائی کی تقریب منعقد ہوئی جس میں پانچوں ٹیموں کے کپتانوں نے شرکت کی۔
اس موقع پر چیئرمین پی ایس ایل کا کہنا تھا کہ پی ایس ایل کے لیے منفرد ٹرافی بنائی گئی ہے، پی ایس ایل کا فائنل لاہور میں کھیلا جائے گا۔ انہوں نے بتایا کہ پی ایس ایل ٹو میں تین ٹرافیاں ہیں، بہترین بیٹسمین اوربہترین بالرکو بھی ٹرافی دی جائے گی، کل فرنچائز کے مالکان کے ساتھ اجلاس میں سیکیورٹی معاملات پر بات ہوگی۔ فائنل کے لیے تمام غیرملکی کھلاڑیوںکوچ اور فرنچائز مالکان کے ساتھ اجلاس ہو گا، بہترین بلے باز کو حنیف محمد ٹرافی بہترین بالر کو فضل محمود ٹرافی اور بہترین وکٹ کیپر کو امتیاز احمد ٹرافی دی جائے گی۔
تقریب میں اسٹیج پر کپتانوں کو مدعو کیا گیا جن میں سب سے پہلے اسلام آباد یونائٹیڈ کے کپتان مصباح الحق آئے، دوسرے نمبر پر کوئٹہ گلیڈی ایٹرز کے کپتان سرفرا ز احمد کو بلایا گیا، پھر پشاور زلمی کے قائد ڈیرن سیمی کو بلا یا گیا، چوتھے نمبر پر کراچی کنگز کے کپتان کمار سنگا کارا میدان میں آئے،سب سے آخر میں لاہور قلندرز کے کپتان برینڈن میک کولم آئے۔ کوئٹہ گلیڈی ایٹرز کے کپتان سرفراز احمد کا اس موقع پر کہنا تھا کہ ٹیم میں زیادہ ترنوجوان کھلاڑی ہیں، امید ہے اس سال بھی اچھا پرفارم کریں گے۔ اسلام آباد یونائٹیڈ کے کپتان مصباح الحق نے گفتگو کرتے ہوئے کہا کہ پی ایس ایل ون جیتنے کی وجہ سے پر اعتماد ہیں۔ لاہور قلندرز کے کپتان برینڈن میک کلم کا کہنا تھا کہ اچھی کرکٹ کھیلیں گے، انتہائی باصلاحیت کھلاڑیوں کے ساتھ نئی شروعات کر رہے ہیں،دوسرے ایڈیشن میں نئےعزم کے ساتھ میدان میں اتریں گے، نوجوان کھلاڑیوں پر مشتمل ٹیم متحد ہو کر کھیلے گی۔ کراچی کنگز کے کپتان کمار سنگا کارا کا کہنا تھا کہ نوجوان اورتجربہ کارکھلاڑیوں کےساتھ اچھے کوچز ہیں۔ چیئرمین پی ایس ایل نجم سیٹھی کا کہنا تھا کہ ٹورنامنٹ بہت دلچسپ ہوگا۔
