ٹریفک پولیس نے اتوار کو پیپلز پارٹی کی سلام شہداء ریلی کے موقع پر کراچی میں ٹریفک پلان جاری کردیا ہے ۔ شہریوں کومتبادل راستے اختیار کرنے کی ہدایت کی گئی ہے۔
پیپلز پارٹی کی 16 اکتوبر کو سلام شہداء ریلی بلاول ہاؤس، بوٹ بیسن مائی کلاچی ،آئی سی آئی چوک، ککری گراؤنڈ ،لی مارکیٹ ، نیپئر روڈ، ڈینسوہال، ایم اے جناح روڈ ، نمائش ، شارع قائدین سے کارساز پہنچے گی۔ ٹریفک پولیس نے شہریوں کیلئے متبادل راستوں کا اعلان کیا ہے ۔
کلفٹن ، ڈیفنس سے ایئر پورٹ جانے والوں کو ہینو چورنگی ، انڈسٹریل ایریا، ،شاہ فیصل کا راستہ استعمال کرنے کی ہدایت کی گئی ہے ۔ شارع فیصل سے ایئر پورٹ جانے والے ایف ٹی سی برج سے کورنگی کا راستہ استعمال کریں ۔
گلشن اقبال سے کلفٹن جانے والے شہید ملت روڈ ، ہینو چورنگی کا روٹ اختیار کریں جبکہ ایئرپورٹ سے صد رجانے والے ڈرگ روڈ ، راشد منہاس روڈ ، اسٹیڈیم روڈ ، پیپلز چورنگی کا راستہ استعمال کریں۔
ایئر پورٹ سے کلفٹن اور ڈیفنس جانے والے شاہ فیصل کالونی ، کورنگی انڈسٹریل ایریا کا راستہ استعمال کریں ، ناظم آباد سے ایئر پورٹ جانے والے نیپا چورنگی ، ڈرگ روڈ کا راستہ اختیا رکریں ۔
ضیاء الدین اسپتال جانے والے سی ویو اور چائنا چورنگی کا راستہ استعمال کریں،ساؤتھ سٹی اسپتال جانے والے بحریہ انڈر پاس کا راستہ استعمال کریں ، جبکہ کلفٹن اور ڈیفنس سے جناح اسپتال جانےو الے چوہدری خلیق الزماں روڈ ، للی برج، اسکول روڈ استعمال کریں ۔
لانڈھی کورنگی سے جناح اسپتال جانے والے کورنگی روڈ، سی ایس ڈی کا راستہ استعمال کریں ۔
