اسلام آباد(ایس ایم حسنین)پاکستان اقوام متحدہ کے متعلقہ فورم سے باہر جوہری تخفیف اسلحہ کے 2017 میں طے پانے والے معاہدے پر تحفظات کے سبب اس میں شامل کسی بھی ذمہ داری کا پابند نہیں، معاہدہ نہ تو عالمی ترقی میں کسی بھی طرح معاون ہے اور نہ ہی روائتی عالمی قوانین کی ترویج میں کسی قسم کا کردار ادا کرتا ہے۔ ترجمان دفتر خارجہ کی طرف سے جوہری تخفیف اسلحہ کے بارے میں جاری اعلامیے میں کہا گیا ہے کہ جوہری ہتھیاروں کی ممانعت سے متعلق معاہدہ جوکہ جولائی 2017 میں اقوام متحدہ کے تخفیف اسلحہ سے متعلق مذاکرات کرنے والے فورم سے باہر مذاکرات کے بعد منظور کیا گیا تھا۔ پاکستان سمیت ایٹمی ہتھیار رکھنے والی ریاستوں میں سے کسی نے بھی معاہدے کےلیے مذاکرات میں حصہ نہیں لیا جس وجہ سے تمام اسٹیک ہولڈرز کے جائز مفادات کو حاصل کرنے میں ناکام رہا۔اس کے علاوہ متعدد غیر جوہری مسلح ریاستوں نے بھی معاہدے میں پارٹیاں بننے سے گریز کیا ہے۔ اعلامیے میں کہا گیا ہے کہ اقوام متحدہ کی جنرل اسمبلی نے 1978 میں جوہری تخفیف اسلحے سے متعلق اپنے پہلے خصوصی اجلاس میں ہونے والے اتفاق رائے پراعتماد کا اظہار کیا تھا کہ تخفیف اسلحے کے اقدامات کو اپناتے ہوئے ہر ریاست کے سلامتی کے حق کو مد نظر رکھا جانا چاہئے ، اور تخفیف اسلحہ کے ہر مرحلے پر اس مقصد کے تحت تمام ریاستوں کی اپنی سلامتی کے لئے ہتھیاروں اور فوجی دستوں کی کم ترین سطح کو برقرار رکھنے کے حق کو ختم نہیں کا جاسکتا۔ اعلامیے میں کہا گیا ہے کہ پاکستان کا خیال ہے کہ اس بنیادی مقصد کو تمام متعلقہ اسٹیک ہولڈرز کے اتفاق رائے پر مبنی عمل کے ذریعہ صرف ایک کوآپریٹو اور عالمی سطح پر متفقہ اقدام کے طور پر حاصل کیا جاسکتا ہے ، جس کے نتیجے میں تمام ریاستوں کے لئے مساوی اور غیر منقول سلامتی کا مقصد حاصل کیا جاسکتا ہے۔ جوہری تخفیف اسلحہ سے متعلق کسی بھی اقدام کے لئے ہر ریاست کی سلامتی کے اہم تحفظات کو مدنظر رکھنا ناگزیر ہے۔ اس کے مطابق ، پاکستان خود کو اس معاہدے میں شامل کسی بھی ذمہ داری کا پابند نہیں سمجھتا ہے۔ پاکستان نے زور دے کر کہا ہے کہ یہ معاہدہ نہ تو کسی طور پر روایتی بین الاقوامی ترقی میں حصہ دار ہے اور نہ ہی کسی طور پر روایتی بین الاقوامی قوانین کی ترویج میں شامل ہے۔
