اسلامی تعاون کی تنظیم او آئی سی کے وزرائے خارجہ کا دو روزہ اجلاس منگل سے ازبکستان کے دارالحکومت تاشقند میں شروع ہو رہا ہے۔
تاشقند: اجلاس میں تنظیم کے رکن ممالک کے وزرائے خارجہ اور وزارت خارجہ کے حکام شرکت کریں گے۔ سیاسی امور کیلئے تنظیم کے ڈائریکٹر جنرل طارق علی بخیت نے بتایا کہ کویت کے وزیر خارجہ اجلاس کے پہلے سیشن کی میزبانی کریں گے۔ ازبکستان کے عبوری صدر شوکت مزائیوف افتتاحی سیشن میں شریک ہوں گے۔ اس موقع پر تنظیم کے سیکرٹری جنرل ایاد امین مدنی کا پیغام پڑھ کر سنایا جائیگا۔ جس میں اسلامی ممالک کو درپیش مختلف چیلینجوں، مشکلات اور سیاسی، اقتصادی اور سماجی امور کا احاطہ کیا جائیگا۔ اجلاس میں فلسطین، شام، عراق، مالی اور میانمر کے حوالے سے قراردادیں پیش ہونے کا بھی امکان ہے۔
