سال 2016 کا سورج خوشیوں، غموں اور تلخ و شیریں یادوں کے ساتھ غروب ہوگیا اور پاکستان سمیت دنیا بھر میں سال نو کی آمد ہوچکی جس کا استقبال شاندار آتشبازی سے کیا گیا۔
دنیا بھر میں عوام نے خطوں، تہذیب، اور روایتوں کے مطابق نئی امیدوں، امنگوں، خطرات اور خدشات کے امتزاج میں 2017 کا استقبال کیا۔ سال کا پہلا سورج نیوزی لینڈ سے طلوع ہوا جہاں مختلف شہروں میں نئے سال کے استقبال کے لیے خصوصی انتظامات کیے گئے تھے۔ نیوزی لینڈ میں سال نو کی سب سے بڑی تقریب آکلینڈ میں ہوئی جہاں اسکائی ٹاور پر آتش بازی کا خوبصورت مظاہرہ کیا گیا جسے دیکھنے سارا شہر ہی امڈ آیا تھا۔
آسٹریلیا کے شہر سڈنی میں نئے سال کا بھرپور انداز میں استقبال کیا گیا، سال کے آغاز پر شاندار آتش بازی کا مظاہرہ بھی کیا گیا جس سے رات میں دن کا سماں لگنے لگا۔
جاپان کے دارالحکومت ٹوکیو میں نئے سال کے آغازپرشاندار تقریب منعقد ہوئی جس میں ایسی شاندار آتش بازی کا مظاہرہ کیا گیا کہ دیکھنے والے مسحور ہو گئے۔
انڈونیشیا میں بھی شاندار آتشبازی کا مظاہرہ کیا گیا جس نے دیکھنے والوں کو دنگ کر دیا۔ سال نو کی خوشیاں منانے کے لیے ملائیشیا میں بھی شاندار آتش بازی کا مظاہرہ کیا گیا جس سے آسمان رنگ و نور میں نہا گی۔
پاکستان میں بھی سال نو کا استقبال انتہائی جوش و جذبے سے کیا گیا، رات 12 بجتے ہی کراچی، لاہور اور اسلام آباد سمیت دیگر چھوٹے بڑے شہروں میں آتش بازی کا مظاہرہ کیا گیا، سال نو پر منچلوں کی بڑی تعداد سڑکوں پر نکل آئی اور سال نو کی آمد کی خوشی میں خوب ہلہ گلہ کیا۔ پاکستان بھر میں نئے سال پر عوام کی جانب سے ایک دوسرے کو سال نو کی مبارکباد دی گئی اور نیک خواہشات کا اظہار کیا گیا۔
