اسلام آباد: پاکستان تحریک انصاف کے ترجمان نعیم الحق کا کہنا ہے کہ حکومتی وزرا ایک جھوٹ کو چھپانے کے لئے کئی جھوٹ بول رہے ہیں اور ایک ذاتی مقدمے کو حکومتی مقدمہ بنا دیا گیا ہے۔
بنی گالا کے باہر میڈیا سے بات کرتے ہوئے نعیم الحق کا کہنا تھا کہ سپریم کورٹ نے عدالتی احاطے میں میڈیا سے بات کرنے سے منع کررکھا ہے لیکن پاناما لیکس کی ہر سماعت کے باہر حکومتی وزرا میڈیا کے سامنے کیس سے متعلق بات کرکے عدالتی احکامات کی دھجیاں بکھیر رہے ہیں اور آج بھی دونوں وزرا نے ہم پر کیچڑ اچھالنے کی کوشش کی۔
نعیم الحق کا کہنا تھا کہ وفاقی حکومت نواز شریف اور ان کے خاندان کو بچانے کے لئے تمام ہتھکنڈے آزما رہی ہے اور ایک جھوٹ چھپانے کےلئے کئی جھوٹ بول رہے ہیں، اور یہ جھوٹ بولنا شریف فیملی کو مہنگا پڑے گا وزرا نے ایک ذاتی مقدمے کو حکومت کےخلاف کیس کا تاثر دے دیا ہے، یہ کیس نواز فیملی کا ذاتی ہے، حکومتی وزرا دفاع کرکے حلف کی خلاف ورزی کر رہے ہیں۔
ترجمان پی ٹی آئی نے کہا کہ خواجہ آصف نے آج پھر کہا ہے کہ انہیں انصاف مل گیا ہے حکومت کا یہ رویہ ظاہر کررہا ہے کہ اقتدار کی کشتی کو ڈوبنے سے بچانے کی کوشش کررہے ہیں لیکن نوازشریف اور ان کے خاندان کے خلاف بہت سے ثبوت آچکے ہیں قوم بہت جلد ایک تاریخی فیصلہ دیکھے گی جس سے ملک میں کرپشن کا راستہ بند ہوجائے گا، جلد ہی حق اور سچ کا سورج طلوع ہوگا۔
