میری بیوی سے علیحدگی ہو گئی ہے

لاہور: قومی کرکٹ ٹیم کے ہیڈ کوچ مکی آرتھر اور چیف سلیکٹر انضمام الحق کے درمیان شدید لڑائی کا انکشاف ہوا ہے۔ معروف سپورٹس صحافی عبد الماجد بھٹی نے انکشاف کیا کہ دورہ انگلینڈ سے پہلے محمد حفیظ کو سکواڈ میں شامل کرنے کے معاملے پر مکی آرتھر اورانضمام الحق میں شدید لڑائی ہو گئی تھی۔ انضمام الحق محمد حفیظ کو سکواڈ میں شامل کرنا چاہتے تھے لیکن مکی آرتھر انہیں سکواڈ میں شامل نہیں کرنا چاہتے تھے، اس معاملے پر بحث بڑھ کر تلخ کلامی کی صورت اختیار کرگئی۔ بعدازاں مکی آرتھر نے انضمام الحق سے یہ کہہ کر معذرت کر لی تھی کہ ان کی اپنی بیوی سے علیحدگی ہوگئی ہے اس وجہ سے وہ کنٹرول سے باہر ہوگئے تھے۔ مکی آرتھر کی جانب سے معذرت کے باوجود محمد حفیظ کو دورہ انگلینڈ پر ٹیم کے ساتھ نہیں لے کر جایا گیا۔ اس کے بعد محمد حفیظ کو دورہ زمبابوے میں شامل کیا گیا لیکن انہیں وہاں صرف دو ٹی ٹوئنٹی میچز کھلائے گئے، ون ڈے سریز میں محمد حفیظ کو موقع نہیں دیا گیا۔ زمبابوے کے خلاف آخری ون ڈے میچ سے پہلے محمد حفیظ نے مکی آر تھر سے پوچھا کہ میرا کیا مستقبل ہے؟ اس پر مکی آرتھر نے کہا کہ تم آخری میچ کھیلو گے لیکن محمد حفیظ نے یہ کہہ کر آخری میچ کھیلنے سے معذرت کر لی کہ امام الحق نے دو سنچریاں بنا لی ہیں، آخری میچ میں بھی انہیں ہی چانس دیا جانا چاہیے۔