ملتان (یس ڈیسک) ضلع ملتان میں دو ہزار پندرہ کی پہلی تین روزہ انسداد پولیو مہم شروع، مہم میں آٹھ لاکھ بچوں کو پولیو سے بچاؤ کے قطرے پلائے جائیں گے۔
ضلع بھر کی ایک سو پچاسی یونین کونسلوں میں سال دوہزار پندرہ کی پہلی انسداد پولیو مہم شروع ہو گئی ہے۔ مہم میں پانچ سال سے کم عمر آٹھ لاکھ بچوں کو پولیو سے بچاؤ کے قطرے پلائے جا رہے ہیں جس کے لیے محکمہ صحت نے لیڈی ہیلتھ ورکرز، سول ڈیفنس ، پولیس اور دیگر محکموں پر مشتمل ایک ہزار آٹھ سو اسی ٹیمیں تشکیل دے دی ہیں جو بس سٹینڈ، سرکاری ہسپتالوں، ریلوے سٹیشن سمیت مختلف جگہوں پر پولیو سے بچاؤ کے قطرے پلانے میں مصروف ہیں۔
مہم کے اختتام میں باقی رہ جانے والے بچوں کو چوتھے روز بھی پولیو سے بچاؤ کے قطرے پلائے جائیں گے۔ انسداد پولیو مہم کے دوران سیکورٹی کے سخت انتظامات کیے گئے ہیں۔
