نظام آباد (اسلم فاروقی) ڈاکٹر محمد اسلم فاروقی صدر شعبہ اردو گری راج گورنمنٹ کالج نظام آباد کو کمشنر کالجیٹ ایجوکیشن تلنگا نہ اسٹیٹ کی جانب سے منائے جانے والے سالانہ اکیڈیمک فیسٹول یواترنگم 2015۔ میں سال گذشتہ مضمون اردو میں پیشہ وارانہ تدریسی مہارت اور دیگر نصابی اور زائد نصاب سرگرمیوں کی انجام دہی پر ریاستی سطح کا بیسٹ اردو لیکچرر ایوارڈ دیا گیا۔
کمشنر کالجیٹ ایجوکیشن محترمہ وانی پرساد آئی اے ایس کی نگرانی میں جے این ٹی یو مانصاب ٹینک آڈیٹوریم میں منعقدہ رنگا رنگ تقریب میں چیرمین ہائر ایجوکیشن ٹی پاپی ریڈی کے ہاتھوں ایوارڈ اور توصیف نامہ پیش کیا گیا۔اسی طرح دیگر مضامین میں بھی سرفہرت اے پی آئی نشانات اسکور کرنے والے لیکچررس کو بھی ایوارڈ دیا گیا۔
گری راج کالج سے اس سال اکیڈیمک فیسٹول میں ایوارڈ حاصل کرنے والے ڈاکٹر محمد اسلم فاروقی واحد لیکچرر ہیں۔ریاستی سطح کا بیسٹ لیکچرر ایوارڈ ملنے پر ڈاکٹر محمد اسلم فاروقی کو کالج پرنسپل ڈاکٹر راجندر پرساد’ وائس پرنسپل’کالج لیکچررس’ دوست احباب اور شاگردوں نے مبارک باد پیش کی ہے۔
قبل ازیں ڈاکٹر محمد اسلم فاروقی کو اردو اکیڈیمی اے پی کی جانب سے بھی بیسٹ ٹیچر ایوارڈ دیا گیا تھا۔ ڈاکٹر محمد اسلم فاروقی نے اپنے وطن نظام آباد آکر فروغ اردو سرگرمیوں کو تیز کیا ہے اور اپنی نگرانی میں قومی اردو سمینار’ گیسٹ لیکچر اور دیگر فروغ اردو پروگراموں کاسلسلہ شروع کیا ہے۔
