کارکنوں کی قیادت کے حق میں نعرہ بازی، پھولوں کی پتیاں نچھاور کر کے نواز شریف کے قافلے کا استقبال کیا جا رہا ہے، گوجرانوالہ میں پڑاؤ کے بعد قافلہ لاہور کے لئے روانہ ہوگا، جی ٹی روڈ کے ملحقہ علاقوں میں استقبالی کیمپ قائم کر دیئے گئے۔
جہلم : مشن جی ٹی روڈ کے تیسرے مرحلے میں نواز شریف کا قافلہ گکھڑ منڈی پہنچ گیا ہے۔ شہر میں داخل ہوتے ہی ہزاروں افراد نے سابق وزیر اعظم کا استقبال کیا، پھولوں کی پتیاں نچھاور کیں اور ان کی حق میں بھی خوب نعرہ بازی کی۔ اس موقع پر سیکیورٹی کے سخت انتظامات دیکھنے میں آ رہے ہیں تو دوسری جانب لیگی کارکن اپنے قائد کی ایک جھلک دیکھنے کیلئے بیتاب ہیں۔ گوجرانوالہ میں سابق وزیر اعظم نواز شریف کے استقبال کیلئے شہر بھر میں خیر مقدمی بینرز اور ہولڈنگز لگا دیے گئے، نواز شریف کی تقریب کیلئے خصوصی سٹیج پر تیاری شروع کر دی گئی ڈائس لگا دیا گیا۔ جی ٹی روڈ اور شہر کی مختلف سڑکوں پر ن لیگی ارکان اسمبلی اور دیگران کی جانب سے سابق وزیراعظم کے خیر مقدمی بینرز لگا دیے گئے ہیں جبکہ بڑی عمارتوں پر خیر مقدمی ہولڈنگ بورڈز کی بہار آگئی ہے جبکہ شہر کے مختلف مقامات پر ناکوں پر پولیس اہلکار مشکوک افراد کی تلاشی بھی لے رہے ہیں، 4000 کے قریب پولیس اہلکاروں کو جی ٹی روڈ پر مختلف استقبالی کیمپوں پر تعینات کیا گیا ہے جبکہ سی سی ٹی وی کیمروں کی مدد سے مانیٹرنگ کا عمل بھی جاری ہے۔
قبل ازیں سابق وزیراعظم میاں نواز شریف کا قافلہ جہلم سے شروع ہو کر مختلف شہروں سے ہوتا ہوا لالہ موسیٰ پہنچا، جہاں کارکنوں نے سابق وزیراعظم کے قافلے کا پرتباک استقبال کیا اور پھولوں کی پتیاں نچھاور کیں۔ میاں نواز شریف نے لالہ موسی پہنچنے پر قافلے میں موجود شرکاء سے مختصر خطاب کیا۔
سابق وزیراعظم میاں نوازشریف نے لالہ موسیٰ ریلی کے شرکاء سے خطاب کرتے ہوئے کہا میں آپ کے والہانہ استقبال کا شکریہ ادا کرتا ہوں، میں ذاتی طور پر آپ کا بہت ممنون ہوں۔ انہوں نے کہا یہ عوام کی عدالت ہے، عوام کو پتا ہے کہ عدالت نے کیا فیصلہ دیا اور عوام کا کیا فیصلہ ہے۔ میاں نواز شریف نے ریلی کے شرکاء سے سوال کیا کہ کیا آپ نے عدالت کے مجھے نکالنے کے فیصلے سے اتفاق کیا؟، عوام کی عدالت کا کیا فیصلہ ہے؟، ہاتھ اٹھا کر بتائیں۔
واضح رہے نوازشریف نے دوسرے روز جمعرات کی دوپہر بارہ بج کر 21 منٹ پر راولپنڈی کے پنجاب ہاؤس سے اپنے سفر کا آغاز کیا۔ وہ گرے رنگ کی بی ایم ڈبلیو میں سوار تھے جسے وفاقی وزیر ریلوے سعد رفیق چلا رہے تھے۔ قافلہ پنجاب ہاؤس سے سیدھا کمیٹی چوک پہنچا جہاں کارکنوں کی بڑی تعداد اور قافلے کی دیگر گاڑیاں ان کی منتظر تھیں۔ کارکنان نے نوازشریف کی گاڑی پر پھولوں کی پتیاں نچھاور کیں اور شیر آیا شیر آیا کے نعرے لگائے۔
کچہری چوک میں جشن کا سماں رہا، لیگی کارکن ڈھول کی تھاپ پر دھمال ڈالتے رہے۔ نواز شریف کا قافلہ پنجاب ہاؤس سے کچہری تک پندرہ سے بیس منٹ میں پہنچا، جہاں پر وکلاء اور سیاسی کارکنوں نے ان کا استقبال کیا۔ طارق فضل چوہدری اپنی گاڑی کے سن روف سے باہر نکل کر کارکنوں کو گرماتے رہے، ہائیکورٹ چوک تک قافلے کی رفتار آہستہ رہی۔ روات کے بعد نوازشریف کی گاڑی تیز رفتاری سے جہلم کی طرف نکل گئی، جس کے باعث قافلہ اور کنٹینر پیچھے رہ گیا۔
سوہاوا، گوجر خان، دینہ میں کارکنوں نے قافلے کا بھرپور استقبال کیا۔ قافلہ ساڑھے پانچ گھنٹے میں جمعرات کی سہ پہر پونے چھ بجے جہلم پہنچا۔ جہاں ان کا شاندار استقبال کیا گیا۔ پھولوں کی پتیاں نچھاور کی گئیں۔ نواز شریف کے خطاب کیلئے سٹیج پہلے سے ہی تیار تھا۔ نواز شریف کے جہلم میں خطاب کے بعد وزیر ریلوے خواجہ سعد رفیق نے اعلان کیا کہ نواز شریف رات جہلم قیام کرینگے۔ نواز شریف نے رات جہلم کے مقامی نجی ہوٹل میں گزاری۔
