اسلام آباد(اصغر علی مبارک) پاکستان سپر لیگ کے تیسرے ایڈیشن کیلئے بیشتر غیر ملکی کھلاڑیوں کا پاکستان آنا مشکوک دکھائی دے رہا ہے تاہم پی سی بی کی کوشش ہے کہ زیادہ سے زیادہ غیر ملکی کھلاڑی پاکستان آئیں ۔ پشاور زلمی کے تمام کھلاڑی پاکستان آرہے ہیں تاہم باقی ٹیموں کے کئی کھلاڑیوں کا پاکستان آنا مشکل نظر آرہا ہے تاہم انہیں بھی پاکستان آنے کے لئے قائل کرنے کی کوششیں جاری ہیں ،پاکستان سپر لیگ کے تیسرے ایڈیشن کا پہلا مرحلہ ختم ہوگیا ہے، 6 ٹیموں میں سے دو ٹیمیں ملتان سلطانز اور لاہور قلندرز ایونٹ سے باہر ہوچکی ہیں جبکہ پوائنٹس کے حساب سے اسلام آباد پہلے، کراچی دوسرے، پشاور تیسرے اور کوئٹہ چوتھے نمبر ہے۔
پہلا پلے آف میچ دبئی میں اتوار کو اسلام آباد یونائیٹڈ اور کراچی کنگز کے درمیان رات 10 بجے ہوگا، دوسرا مقابلہ 20 مارچ منگل کو لاہور میں پشاور زلمی اور کوئٹہ کے درمیان ہوگا جبکہ تیسری اور چوتھی پوزیشن کیلئے میچ 21 مارچ کو لاہور میں کھیلا جائے گا اور فائنل 25 مارچ اتوار کو کراچی میں ہوگا۔چاروں ٹیموں کی خواہش ہے کہ ان کے غیر ملکی کرکٹرز میچ کیلئے پاکستان آئیں تاکہ وہ پوری قوت سے مقابلہ کرسکیں تاہم بعض غیر ملکی کھلاڑیوں نے پاکستان آنے سے انکار کردیا ہے۔
اسلام آباد یونائیٹڈ کے سمت پٹیل، چیڈوک والٹن، لیوک رانکی، سمیول بدری، جے پی ڈومینی نے پاکستان آنے پر آمادگی ظاہر کردی ہے تاہم تین کھلاڑیوں الیکس ہیلز، اسٹیون فن اور سیم بلنگز نے پاکستان جانے سے انکار کردیا ہے۔پشاور زلمی کے جاوید آفریدی نے بتایا ہے کہ ان کے تمام غیرملکی کرکٹرز رات تک پاکستان پہنچ جائیں گے جن میں ڈیرن سیمی (کپتان )، لائم ڈاسن ، کرس جارڈن اور ڈوئن اسمتھ شامل ہیں۔
کراچی کنگز کے کپتان این مورگن نے پاکستان نہ جانے کا فیصلہ کیا ہے تا ہم کراچی کنگز کے کالن انگرم، جو ڈینلی، ٹائمل ملز، روی بوپارا اور لینڈل سمنز کے پاکستان آنے کا امکان ہے۔کوئٹہ گلیڈی ایٹرز سب سے زیادہ مشکل کا شکار ہے کیونکہ کیون پیٹرسن اور رائلے روسو سمیت اس کے 4 غیر ملکی کھلاڑیوں نے پاکستان آنے سے انکار کردیا ہے جبکہ کرس گرین کے آنے کا امکان ہے۔
کوئٹہ گلیڈی ایٹرز نے کہا ہے کہ وہ تھیسارا پریرا اور دیگر سری لنکن کھلاڑیوں سے رابطے میں ہیں اور انہیں قائل کرنے کی کوشش کررہے ہیں، بنگلادیش کے محمود اللہ بھی کوئٹہ گلیڈی ایٹرز کو جوائن کرسکتے ہیں، ٹیم کے پاکستانی کھلاڑی شارجہ سے لاہور پہنچیں گے جبکہ غیرملکی کرکٹر 19 مارچ کو لاہورآئیں گے۔واضح رہے کہ پی ایس ایل 2 کا فائنل لاہور میں کوئٹہ اور پشاور کے درمیان ہوا تھا اور کوئٹہ کی شکست میں غیر ملکی کھلاڑیوں کی عدم دستیابی اہم وجہ رہی تھی، لاہور میں ہونے والے دو پلے آف اور کراچی میں ہونے والے فائنل میچ کے انتظامات کو حتمی شکل دی جارہی ہے ۔
سپر لیگ کے شائقین کیلئے انتہائی بری خبر، پشاور زلمی کے سوا باقی ٹیمیں ٹھس ہوگئیں
