اوٹاوا…….خراٹوں سے تنگ افراد پریشان نہ ہوں کیونکہ اب ماہرین نےنورا نامی ایک تکیہ تیار کیا ہے جو خراٹوں کو روکنے میں مددگار ثابت ہوگا۔کینیڈین کمپنی کی جانب سے تیار کئے گئے اس تکیے کے اندر الیکٹرانک نظام نصب ہے جو خراٹے کی آواز سن کر تکیے کو پھیلاتا اور سکڑتا ہے۔ اس طرح خراٹے لینے والے کا سر دوسری پوزیشن میں آ جاتا ہے اور خراٹے کم ہو جاتے ہیں۔ خراٹے کی آواز سن کر تکیے کے اندر خودکار پمپ کام کرنے لگتا ہے جو سونے والے کی پوزیشن بدل دیتا ہے جبکہ اس عمل سے حلق کے پٹھوں کو بھی سکون ملتا ہے اور سانس لینے میں آسانی ہو جاتی ہے۔ ماہرین کا کہنا ہے کہ خراٹے لینے والے شخص کا سر نیند میں ہلایا جائے تو منہ میں ہوا جانے کی پوزیشن کچھ بدل جاتی ہے اور تھوڑی دیر میں خراٹے کم یا رُک جاتے ہیں کیونکہ جب تک حلق کے اوپری حصے کے پٹھوں پر دباؤ نہیں پڑتا اس وقت تک خراٹے شروع نہیں ہوتے جبکہ یہ تکیہ عین اسی وقت کام کرتا ہے جب خراٹے شروع ہونے والے ہوتے ہیں۔
