خیبر پختونخوا حکومت نے چین پاکستان اقتصادی راہداری منصوبے میں صوبے کو نظر انداز کرنے کے خلاف پشاور ہائیکورٹ سے رجوع کرنے کا فیصلہ کیا ہے۔ اسپیکر خیبر پختونخوا اسمبلی صوبے کی طرف سے کل عدالت عالیہ میں رٹ دائر کریں گے۔
خیبر پختونخوا حکومت کے ترجمان مشتاق احمد غنی نے بتایا کہ وفاق نے چین پاکستان اقتصادی راہداری کا مغربی روٹ تعمیر کرنے اور خیبر پختونخوا کا اس کا جائز حصہ دینے کا وعدہ کیا تھا۔ لیکن ایک رابطہ سڑک کے سوا صوبے کا سی پیک میں کوئی حصہ نہیں دیا گیا۔ نہ ہی وفاقی حکومت سی پیک معاہدے کی دستاویزات فراہم کی گئیں۔
مشتاق غنی نے بتایا کہ صوبائی اسمبلی نے سی پیک میں صوبے کو اس کا جائز حق دینے کے لئے متفقہ قرار داد کی منظوری بھی دے چکی ہے۔ تمام جماعتوں کے پارلیمانی لیڈروں نے اسپیکر کو اختیار دیا ہے کہ وہ صوبے کے حقوق کے لئے قانونی راستہ اختیار کریں۔ اسی فیصلے کی رو سے اسپیکر کل وفاقی حکومت کے خلاف پشاور ہائی کورٹ میں رٹ دائر کریں گے۔
