بنگلور (ویب ڈیسک) بھارتی اداکارہ و سیاستدان رمیانے کہا ہے کہ وہ بغاوت کا مقدمہ قائم کیے جانے کے باوجود اپنے اس بیان پر قائم ہیں کہ پاکستان جہنم نہیں ہے۔
دویا سپند نا المعروف رمیا کانگریس کی رہنما ور سابق رکن پارلیمان ہیں ۔ حال ہی میں وہ سارک کے ایک اجلاس میں شرکت کیلئے اسلام آباد آئی تھیں جہاں پاکستانیوں کی مہمان نوازی نے انکا دل موہ لیا ۔ کرناٹک سے تعلق رکھنے والی رمیانے کہا تھا پاکستان جہنم نہیں ہے، وہاں کے لوگ ہم جیسے ہی ہیں اور وہاں ہماری اچھی مہمان نوازی کی گئی ۔ انہوں نے بظاہر یہ بات بھارتی وزیر دفاع منوہر پاریکر کے ایک بیان کے جواب میں کہی تھی جس میں انہوں نے کہا تھا پاکستان میں جانا اور جہنم میں جانا ایک ہی بات ہے۔
بغاوت کا مقدمہ قائم کیے جانے کے بعد رمیا نے ایک ٹی وی چینل سے بات کرتے ہوئے کہا وہ اپنے بیان پر قائم ہیں اور انہوں نے ایسی کوئی بات نہیں کہی جس کیلئے وہ معافی مانگیں ۔ انہوں نے کہا معافی مانگنا میرے لیے سب سے آسان کام ہے لیکن یہ مسئلے کا حل نہیں ، آج کل ملک میں حالات کچھ ایسے ہیں کہ کسی کے بھی خلاف بغاوت کا مقدمہ قائم کیا جاسکتا ہے ۔ اس قانون کا غلط استعمال کیا جا رہا ہے اور میرے خیال میں اسے ختم کرنے کا وقت آگیا ہے ۔ بی جے پی اور اس کی طلبہ تنظیم کے کارکن رمیا سے معافی مانگنے کا مطالبہ کر رہے ہیں۔ ان کا کہنا ہے یا تو وہ معافی مانگیں یا پاکستان چلی جائیں۔
سوشل میڈیا پر بھی ان کے بیان پر بحث جاری ہے ۔ بعض ان کی حمایت اور بعض انہیں پاکستان چلے جانے کا مشورہ دے رہے ہیں لیکن رمیا کا کہنا ہے یہ ان کی رائے ہے اور انہیں اختلاف رائے کا حق حاصل ہے۔ انہوں نے کہا لوگ مجھ سے پوچھ رہے ہیں اتنا سب کچھ ہو رہا ہے (انڈوپاک تعلقات میں تلخی ) اور ایسے حالات میں آپ پاکستان کی تعریف کیسے کر سکتی ہیں؟ میراجواب ہے میں پاکستان کے شہریوں کی بات کر رہی تھی ، میں اپنے تجربے کی بات کر رہی تھی ، اگر یہ غلط ہے تو ہمارا خدا ہی حافظ ہے ۔
