لاہور میں دن بھر موسم انتہائی گرم رہے گا ، تاہم شام کے اوقات میں تیز بارش سے موسم خوشگوار ہوجائے گا
لاہور (یس اُردو ) ملک میں آج سے مون سون بارشوں کے نئے سلسلے کا آغاز ہوگا ، کراچی میں بارہ اور تیرہ جولائی کو کھل کر بارش ہوگی ، پنجاب کے مختلف شہروں میں بھی برسات ہوگی ، محکمہ موسمیات نے خبردار کر دیا ۔ ہوشیار باش مون سون کا نیا سلسلہ آج سے پھر تہلکہ مچانے آرہا ہے ۔ ملک کے مختلف شہروں میں تیز بارش ہوگی جس سے جھل تھل ہونے کا امکان ہے ، محکمہ موسمیات نے الرٹ جاری کر دیا ۔ موسم کی خبر دینے والے مزید کہتے ہیں بارہ اور تیرہ جولائی کو کراچی میں موسلا دھار بارش ہوگی ۔ نشیبی علاقے بھی زیرآب آسکتے ہیں ، آج لاہور میں موسم دن بھر گرم رہے گا تاہم شام کو تیز بارش لاہوریوں کو ٹھنڈا کردے گی ۔ اسلام آباد ، خیبر پختونخوا ، سکھر ، میرپور خاص ، ژوب اور کشمیر سمیت مختلف بالائی علاقوں میں بھی تیز بارش ہوگی ۔ مون سون بارشوں کا سلسلہ جمعرات تک جاری رہے گا ۔
