آسٹریلوی بلے باز کی موت کے حوالے سے تحقیقات مکمل ہو گئیں ، کمیشن نے اپنا فیصلہ سنا دیا
سڈنی : باؤنسر لگنے کے باعث وفات پانے والے آسٹریلوی کرکٹر فلپ ہیوز کی موت کی تحقیقات مکمل ہو گئی ہیں ، تحقیقاتی کمیشن نے کھلاڑی کی موت کو حادثہ قرار دیا ہے ۔ آسٹریلیا کے دلکش بلے باز فلپ ہیوز کی موت کی تحقیقات مکمل ہوگئیں ، تحقیاتی کمشن کے سربراہ مائیکل بارنز نے نوجوان بیٹسمین کی موت کو حادثہ قرار دے دیا ہے ۔ کمیشن کے فیصلے میں کہا گیا ہے کہ ہیوز کی موت میں کوئی امپائر یا بائولر قصور وار نہیں ۔ آسٹریلوی بلے باز دو سال قبل ڈومیسٹک کرکٹ کے میچ میں شان ایبٹ کے باؤنسر کا نشانہ بنے تھے جو ان کیلئے جان لیوا ثابت ہوا ۔ انہوں نے 26 میچوں پر مشتمل اپنے ٹیسٹ کیرئر میں 3 سنچریاں اور 7 نصف سنچریاں بنائیں جبکہ 25 ون ڈے میچز میں 2 سنچریز اور 4 ففٹیز ان کے نام ہیں ۔ فلپ کی موت کرکٹ لورز کیلئے ایک بڑا صدمہ تھی ، ان کی شاندار بلے بازی کو ہمیشہ یاد رکھا جائے گا ۔
